Iban Jauh Ngelekai
Udah
tembu “doa” dibacha ngagai semua penumpang dia alai Flight B1854 Royal Brunei
Airlines belabuh serunyut bejalai ba padang bilun antarabansa Kuching. Jam maya
nya pukul tiga lemai kena tiga ari bulan lapan 2009. Bilun berangkat endang
nitihka jam lalu penerebai ari Kuching ngagai Bandar Seri Begawa disadang dalam
pengelama sejam sepuluh minit. Limpang
mimit kenang ba senentang “doa”. Diperatika aku ba menua ti udah alai bejalai dia
alai nadai tentu mayuh bilun ti bisi meri
awak ngagai penumpang macha “doa” tauka sembiang dikena merekat
penerebai bilun sebedau sida berangkat.
Keterubah iya aku ampit enggau besembiang iya nya lebuh terebai ngena
Batavia Air ti angkat ari Jakarta ngagai Banjarmasin ba taun 2006. Tak asai ka
chelap agi ati udah macha sembiang laban nangi enggai ka utai ti enda disadang
nyadi di langit.
Taja
pan udah berangkat kurang lebih sepuluh minit ari padang bilun tang rampa menua
Kuching endang agi nyengala dipeda. Kelimpah ari ti merening pemanah rampa
menua ari alai aku ti duduk aku endang selalu berunding ka baka ni bansa kitai
Iban udah ngelekai pambar di pulau Borneo. Kebuah pia laban sambil ti di
kangauka orang meri lecture pasal politik menua Sarawak enggau Malaysia ngagai
pemesai-pemesai ba Ministry of Foreign
Affairs Brunei aku mega diberi peluang bejalai ngagai menua kitai Iban di Temburong.
Nya meh utai ti ngasuh ati gagit laban deka betemu sereta meda ubah enggau ikas
pengidup kitai Iban ti diau di luar
Sarawak.
Aku
mega agi ingatka pengawa diri ti nguji deka ngiga bansa kitai Iban di Taiwan
lebuh aku ti bisi peluang enggau orang Visiting Fellowship sebulan ba
Department of Politics di National
Taiwan University di Taipei ba taun 2008 suba. Mayuh endar berita ti madah ka
bansa ti sama enggau kitai Iban agi bisi di menua nya. Aku enda ngiga jauh tang
nemuai ngagai Shung Ye Museum of Formosan Aborigines ti semina seberai jalai
National Palace Museum di Taiwan. Kelimpah ari ti meda video pasal mayuh macham
bansa ti bisi kala nguan menua Taiwan aku mega meda kereban ti dikena sida
ngidupka diri lalu ninga sereta meratika jaku ti dikena sida bejaku enggau
pangan diri. Kereban ti dikena ngidupka diri baka betenun endang bisi sama
enggau ti dikena suku bansa ti bisi di Pulau Borneo. Nitihka cherita dalam video
ti dipandang ngagai orang mayuh enggau temuai ti bisi nyenguk museum nya dia
alai sida ngambu mayuh suku raban bansa ti mayuh nguan menua di Asia Tenggara
tu endang datai ari tanah besai China
lalu ngelekai ngagai Taiwan lalu udah nya baru ngelekai ngagai alai bukai. Aku
semina ngangguk ka pala lebuh ninga “teori” nya tadi taja pan aku nemu mayuh
teori bukai ti bisi nguji nerangka penatai bansa asal di menua Asia Tenggara. Ambika
banding Benedict Sandin mega bisi teori ti madahka penatai bansa Iban ari Batang
Kapuas. Teori tu selalu dikena orang ti mansik asal penatau enggau adat lama kitai
Iban di Sarawak. Tu endang bisi pengamat laban mayuh cherita kitai Iban bisi sama
enggau cherita tuai bala orang di Kalimantan Barat tin guan batang Kapuas. Aku
agi ingat ka diri ti betemu enggau siko ari orang ti landik senentang adat asal
ari menua Kalimantan lebuh ngulu siti Persidangan
Sejarah Antarabansa di Brunei ba taun 2008. Iya madahka diri Pangeran Ratu Sri
Negara H.R.M Ikhsan Perdana ti agi nampung turun Kesultanan Sintang. Iya mantai
ka siti cherita main asal ti besangkut paut enggau Pulang Gana lalu cherita nya
endang mayuh endar sama enggau cherita Simpulang Gana ti ditemu kitai Iban di
Sarawak. Laban ti deka nemu enggau dalam agi aku lalu ngerandau iya lebuh makai lemai. Mayuh amat cherita tudah
tuai lalu tu endang siti ari pekara ti ngamatka penatai kitai Iban menya ari
Batang Kapuas.
Pulai ngagai cherita aku ba Taiwan baru. Nitihka
leka jaku ti ditulis tiap suku bansa di Taiwan ti ngena tulis Roman lalu bisi
dipandangka ba Shung Ye Museum of Formosan Aborigines Taiwan dia alai asai sepi
aku enti sema kitai Iban bisi di Taiwan tentu sida udah lama bekejang ninggalka
menua nya laban ari leka jaku 14 iti pupu raban bansa endang enda sama enggau
kitai Iban. Asai sepi aku nyangka semak agi munyi jaku ti dikena enggau jaku
orang Filipina, Tagalog.
Enda
berasai pengelama udah ba langit dia alai bilun lalu terengkah di padang bilun
antarabansa di Brunei. Lebuh ti datai pintu pemansut aku lalu betemu enggai pemesai
ari Kementerian Luar Brunei, Dr Norahbihah ti endang udah nganti aku. Aku lalu dianjung
ngagai hotel Rizqun alai aku diau lebuh di Brunei. Lebuh aku nanya iya nama kepakaran iya dia alai Dr
Norahabibah madahka diri orang ti mansik pengawa orang jai baka terrorism. Ari
penemu ti dipansutka iya endang mandangka ngembuan pengelandik ba pelajar iya
lalu udah suah mantaika keretas jurai ba menua tasik. Dalam rantu jalai ngagai
hotel dia iya madah ngagai aku program sida ti deka mai bejalai lalu meda siti
ari menua ti endor pendiau bansa Iban di
Brunei. Aku berasai lantang ati laban tu meh peluang ulih meda sereta betemu
enggau bansa Iban ti diau ba menua bukai.
Kelimpah
ari ti ingatkan Iban di Brunei pengingat aku ka bansa kitai Iban ti bisi pindah
lalu nguan menua Sabah mega endang agi nyengala terang. Ambika banding, dalam
bup iya Peturun Iban dia Benedict
Sandin bisi ngenang pemegi kitai Iban ka menua Sabah. Sekeda ari sida ke
pegi endang lalu netap diau mendam di
menua din. Iya mega bisi ngenang kitai Iban ti bisi sama ampit enggau orang
ngalahkan Mat Salleh di Sabah menya. Kena
24 ngagai 26 bulan lapan 2009 tu tadi aku mega bisi nemuai lalu bejalai betemu
enggau bansa kitai Iban di Sabah. Dua bengkah pendiau kitai Iban ti bisi di
Tawau iya nya di Merotai enggau di Kuala Nansang. Bala Iban ba dua buah
genturung pendiau tu endang datai ari Sarawak. Lebuh ditanya kami sebuat
senentang penatai sida mega madahka diri ari Sarawak lalu sekeda ari sida
endang selalu bisi pulai ngundang menua lama sida.Penyauh genturong pendiau
bansa Iban di Merotai ari pasar Tawau iya nya kira 40 minit enti nepan teksi.
Ba genturung pendiau sida mega bisi kebun dandang sawit ti besai, rumah gereja,
Tadika KEMAS lalu pia mega bisi api elektrik siang malam.
Maya sida sebuah pindah ka Tawau suba nadai
bereta laban bisi dulu agi lalu bisi mega laun agi. Ambika banding siko ari
kitai Iban ti chukup lama udah pindah ke Merotai iya nya benama Tijut anak
Timu. Iya madahka diri ari Pakan Lemuyan pindah ke Sabah ba taun 1948 menya.
Lebuh ditanya senentang pengingat iya ka menua asal dia iya endang agi terus
ingat ka menua lama iya di Pakan. “Aku pindah kitu ba taun 1948 menya lalu endang
nadai ati mulaika diri laban nyau bisi bini anak lalu pia mega bisi tanah alai betanam
betupi baka orang bukai di menua ditu”, ko tudah tuai lebuh ti ditanya kemaya
iya pindahka menua Sabah. Lebuh aku madahka diri datai ari Kabo dia iya tuchum
lalu madahka menua kami duai sigi enda jauh. Kelimpah ari ti bisi tanah alai netapka
pendiau ti meruan bala Iban di dua buah genturung menua tu endang bisi Tuai
Kampung ti dikelala perintah menua sida. Siko ari Tuai Rumah Iban di Merotai
iya nya TR Lulot anak Jungal ti pindahka Merotai ba taun 1969. Menua asal iya ari
Katibas. Sida pindah ketegal ari ti enggau orang kereja kayu. Iya madahka diri endang
selalu bisi nemuai ngundang menua lama iya di Sarawak. Iya mega madah ngagai
kami bisi endar bala tuai-tuai kitai Iban ari Sarawak udah bisi ampit nemuai
ngagai menua sida di Merotai. Tuai Kampung Lulot mega madahka pengaga ati diri
ninga rita bala kitai Iban di Sarawak ti sama bisi ampit peluang mansang baka
orang bukai.
Sebuah agi genturung pendiau Iban di Tawau iya
nya ba menua ti dikumbai sida Kuala Nansang. Penyauh genturung pendiau sida di
Kuala Nansang ari pasar Tawau iya nya kira 20 batu. Enti nemuai ngagai Kuala
Nansang kitai niti Jalan Apas lalu nuju Jln Quin. Sepemanjai jalai nya kitai
meda ladang kelapa sawit lalu dalam dandang kebun sawit kitai mega meda mayuh endar tuga tebelian ti udah
ditebang. Ari pemayuh batang tebelian ti baka garing ba tanah mandangkan menua
tu endang sigi mayuh tebelian. Di Kuala Nansang Tua Kampung John anak Sulutanmegai
60 pintu lalu baka kitai ditu iya mega bisi JKKK ti mantu iya ngereja pengawa
lalu berundingka atur pemansang ba menua sida. Ba kampong sida mega bisi gerija,
sekula primari alai nembiak belajar. Kelimpah ari ti kereja perintah, gawa ba
kompeni bala Iban ba Kuala Nansang mega ngereja pengawa betanam betupi baka
nanam sawit. Ari dipeda ngena mata kasar dia alai sida berupai bisi endar
penyamai lebuh ti ngidupka diri di menua orang. Tua Kampung mega madahka bala
nembiak nyamai diatur sereta digempung lalu nadai mayuh penanggul. Taja pan nadai adat ti bebatang
baka Adat Iban ti dikena Tuai Rumah kitai Iban di Sarawak tang sida ulih ngatur
penusah ti mit-mit enggau jalai ti alus.
Nampung
pejalai aku ti ka Brunei baru. Pejalai aku ngagai menua Temburong belabuh ngena
jalai ai. Agen dagang temuai ari menua Australia ti benama Alan Riches nganjung
aku ngagai pengkalan ba Sungai Brunei. Ari pengkalan nya kami dibai nepan perau
speed
boat tauka dikumbai sida Water Taxi
ti muat kira tiga puluh enam iko orang.
Pejalai ngilika ai Brunei lalu pansut ngagai muara lalu udah nya baru mudik
ngagai sungai Temburong. Pengelama
ngena speed boat kira 40 minit. Ari pengkalan ba ili jematan Temburong kami lalu
nuju pengkalan perau panjai kira ka 20 minit ngena kereta. Ari pengkalan nyalalu
mudik batang sungai Temburong ngagai National Park. Pejalai kin kiri 40 minit
ngena perau enggau injin tiga puluh kuda. Nyau kepuas ka berandau aku nanya ka
penatai orang ti ngemudi lalu megai injin perau kami. Iya madah ka diri ari Julau lalu udah bekereja di
Brunei kurang lebih 8 tahun. Ari jalai
iya ngemudika perau kami sebuat sari nya mandangka iya udah ngembuan pengelandik enggau penyikar ti
chukup. Kami mudik ke ulu ngagai menua dikumbai Ulu-Ulu Resort. Kami mega bisi
bejalai kaki nanjak bukit mimit sebedau manggai ba tuchung ti bisi disediaka
alai Canopy Walk. Peninggi Canopy Walk nya
60 meter
Pulai
ari ulu Temburong kami ngetu ba dua buah rumah panjai kitai Iban. Dua buah
rumah panjai nya rumah Igat anak Tarang di Sumbiling, Temburong enggau sebuah
agi rumah panjai ti enda bangat jauh ari nya, iya nya rumah Jamat anak Malong,
Kampung Sibut. Lebuh ti ngetu ba rumah Jamat anak Malong aku ngambi peluang
ngerandau bala indu ti benung nusuk atap daun apong. Kelimpah ari ti nanyaka
penatai kami mega mayuh utai dikenang taja pan awak ke ngetu nya enda tentu
panjai. Lebuh ti berandau kami mega dibantai ka Tuai Rumah Jamat sebaka buah
mutan ti chukup pemanis. Rumah Jamat endang
teleba ditapatka nemuai laban sida ngemeranka home stay ngagai temuai ari luar ti deka ngasaika pendiau ba rumah
panjang. Ba sukut rumah panjai sida bisi library
ti mandangka nembiak enggau orang ba rumah panjang nya bisi pengeransing ba pengawa
macha tauka begiga penemu ti dalam agi.
Lebuh
ti ngetu ba rumah Igat kami mega bisi dibai orang tama ka bilik. Aku mega ngena
peluangnya ngambi gambar senentang rumah
panjainya. Ba dinding tiap pintu bilik endang bisi disangkingka kerja jari (kraftangan)
sida ba rumah panjainya ke peda tauka dijual ngagai bala temuai ti bisi datai.
Nitih ko David anak Insol, siko ari kitai Iban ari menua nya ti ngemeranka
pengawa dagang temuai, rumah panjai Igat mega selalu ditiki bala temuai.
Langkar rumah panjai endang agi baka enggi kitai ditu laban iya agi begantung.
Ba mua pintu bilik Tuai Rumah Igat diengkah ka nama iya ti nyadi Tuai Rumah lalu
digembar enggau gambar Sultan Brunei. Tu mandangka penaluk enggau pengangkun
ati sida ti nyadi rayat Brunei.
Taja
pan berandau enggau ngerampas aja enggau bala Iban ba dua buah rumah panjai nya
tadi tang ati berasai puas kelebih agi ngasaika diri ulih betemu enggau kitai
sama kitai. Kebuah pia laban kitai ngena jaku ti sama, adat asal, penatai
enggau pengingat lama ti sama nya alai nyamai dikena ngepunka randau. Randau
enggau sekeda ari bala Iban di rumah panjai dua iti nya tadi deka ditampung aku
ka ujung agi laban malamnya aku bisi peluang berandau enggau bala ari Persatuan
Iban Brunei. Yang Dipertua Persatuan Iban Brunei, Salanjat Jugi enggau dua iko
agi raban iya, Mauh anak Malang enggai
Tinggi anak Kelai sama bisi datai ngulu aku ba alai ti diau. Sida sebuah tu
diau di Daerah Tutong. Aku rindu endar berandau laban utai ti dikenang nya ukai
semina pasal pengawa sekula tang mega main asal, pengarap, penatai kitai Iban
lalu pia mega pemindah kitai Iban ari Sarawak ngagai menua bukai. Sida mega becherita
ngagai aku senentang penatai sida di Brunei lalu dini alai asal aki ini
sida. Tu kedua kali aku betemu enggau
sida laban ba taun 2007 menya aku udah betemu enggau sida di Brunei leboh bisi
seminar pasal pribumi ti di atur di
Universiti Brunei Darussalam. Aku agi ingat bendar ka tanya sida ngagai aku
senentang pendiau enggau ubah pemansang kitai Iban di Sarawak lebuh aku ti
ngenataika siti kertas jurai lebuh maya nya subah. Enda berasai kami ti udah
berandau dia ari nyau udah jauh malam lalu kami sebuat ngetu sereta beserara.
Dalam ati enggau sampi endang ngarapka diri ulih betemu baru dudi ari ila. Ari
siti aku mulaika diri ka Kuching.
Kenang
aku di atas tadi dikenatai sereta disambil aku enggau jalai becherita awak ka
nyamai dibacha bala mayuh. Batang tauka pun kenang iya nya senentang kitai Iban
ti udah jauh ngelekai mindah ngagai menua bukai. Lalu laban endang agi ngembuan
jaku, main asal sereta pengingat tuai ti sama dia alai nyamai amat berandau
enggau bansa Iban nadai milih dini alai sida diau. Naka ka diatu menua tauka
nengeri ba Pulau Borneo udah serap bisi alai bansa kitai Iban ngelekai.
Dikarang :
Dr Neilson Ilan Mersat
Meruji Kabo, Saratok, Sarawak.
E-mail : mnilan@fss.unimas my
Tiada ulasan:
Catat Ulasan