Khamis, 16 Ogos 2012

Penemuai ke Palangka Raya, Kalimantan Tengah


Penemuai ke Palangka Raya, Kalimantan Tengah
Dikarang Neilson Ilan

Taja pan pengagit ati lebuh sangkai ba padang bilun Tjilik Riwut di Palangka Raya, Kalimantan Tengah kena 21 Mei 2011 tu tadi enda ngemalat pengerindu ati lebuh ti nurun di Kansai International Airport di Osaka tauka Kingsford Smith Airport di Sydney, tang ati aku bisi berasai gaga mimit laban tu meh penyangkai ti penudi iya dalam pejalai aku ti nguji bejalai matau sekeda ari indu nengeri di menua Kalimantan.Tjilik Riwut iya nya nama tuai bansa Dayak Ngaju ti bepengarap Katolik lalu udah nyadi Gabenor Kalimantan Tengah dulu suba. Nya alai nama padang bilun Palangka Raya diberi nama Tjilik Riwut dikena ngingatka iya.   Bilun Batavia Air Y6-371 ti ditepan ari Jakarta bisi sejam laun berangkat. Nitih ko leka serabana bala mayuh ti sama bakadugau nganti ba padang bilun Soekarno-Hatta di Jakarta utai baka tu endang selalu nyadi. Sida enda belalai madahka penanggul bilun ti selalu nyadi kelebih agi penerbai dalam nengeri. Pangan aku ti mupuk sari tumu agi ari kami madahka bilun ti dikena iya bisi laun berangkat lebih empat jam. Sambil meratika orang ti sama nganti ba padang bilun nya aku lalu ngenang utai tu enggau indai tuai aku ti duduk sepiak aku. Kami duai manding enti sema bilun ti selalu laun sereta enda nitihka jam tu nyadi di Malaysia. Indah laun setengah jam tauka sejam bala penumpang udah begau. Tu nyau datai ngagai empat jam di menua Indonesia. Aku agi ingatka sekali lebuh bejalai ngena bilun ari Kuching ke Kuala Lumpur ba taun 2001 menya. Bilun nya patut angkat pukul semilan pagi tang kami semina ulih berangkat kira pukul empat lemai. Aku agi ingat endar ningaka sekeda ari serebana bala mensia mayuh sari nya.    

Sereta kami terengkah ba padang bilun Tjilik Riwut di Palangka Raya kira ka pukul empat setengah lemai dia aku tepedaka siti genteran jaku gerah ti ditulis enggau naka pemesai lalu madahkah bisi pengerami bala Dayak ti dikumbai sida Cultural Festival Isen Mulang. Reti leka jaku peransang “Isen Mulang” iya nya “anang surut”. Disempulang enggau jaku gerah nya mega gambar orang ngajat lalu ngena ngepan ti chukup sereta nadai timpang. Dalam ati aku nyangka amat meh menua Kalimantan Tengah tu endang sigi penatai pun menua bansa Dayak di Kalimantan. Aku lalu nelai bini aku madahka  kami duai enda patut ngelepaska peluang meda “cultural festival” nya lebuh diau di Palangka Raya. Endang sigi amat udah mayuh endar  didinga  sereta dibacha senentang menua Kalimantan Tengah tauka Palangka Raya kelebih agi ba berita dunya dagang temuai.  Pelilih menua Kalimantan Tengah  endang sigi ngemerankan dagang temuai laban ti ngembuan mayuh alai ti ulih dikena narit ati bala temuai ti bisi datai  ari luar. Kelimpah ari berita pemanah rampa menua dia alai berita ti enda tentu manah baka penyarut entara bansa Dayak enggau bansa bukai mega bisi dikarang orang dalam internet. Ambika chunto siti ari endur alai bansa Dayak ti bisi penyarut enggau bansa orang ti datai iya nya bansa  Madura bisi nyadi di Sampit belabuh ba taun 2001 menya. Mayuh endar bala Madura bebadi ketegal penyarut nya. Penyauh menua Sampit tu kira ka lima jam enti ngena jalai darat ari indu nengeri Palangka Raya.

Kalimantan Tengah
Pupu raban bansa Dayak ti tebal agi diau di menua Kalimantan Tengah iya nya Dayak Ngaju, Dayak Ot Danum, Dayak Maanyan, Dayak Dusun enggau Dayak Tamuan. Kalimantan Tengah bisi 13 iti sitak menua dikumbai sida kabupaten lalu siti kota iya nya Palangka Raya. Nyadi pemesai menua Kalimantan Tengah iya nya 153,560 km persegi. Kalimantan Tengah iya nya siti ari sitak ti pengabis besai di Indonesia.

Sebedau serara ba taun 1957 menya dia alai menua Kalimantan Tengah enggau Kalimantan Selatan tu endang siti sitak. Penyarut entara bansa Dayak enggau bala Banjar ngujungka menua tu disapat nyadi dua iti. Sebengkah dikumbai Kalimantan Selatan lalu indu nengeri sitak tu iya Banjarmasin. Indu nengeri Kalimantan Tengah iya nya Palangka Raya lalu sitak tu tebal agi diuan bansa Dayak. Aku agi ingat lebuh ti bisi nemuai ngagai Universiti Lambung Mangkurat di Banjarmasin  ba taun 2008 menya dia alai siko ari tuai menua nya bisi nyebut senentang laya lama entara dua bengkah menua tu. Maya nya menya apin tentu nemu cherita entara Kalimantan Tengah enggau Kalimantan Selatan. Diatu baru meretika endar menua Kalimantan Tengah tu tebal agi dipegai bansa Dayak lalu Gabenor sida ka diatu endang bansa Dayak Ngaju iya nya Agustin Teras Narang. Nyadi Kalimantan Selatan dipegai bansa Banjar ti megai pengarap Isalm.    

Sepemanjai jalai ari padang bilun Tjilik Riwut ngagai indu nengeri Palangka Raya dia alai identiti bansa Dayak endang ulih dipeda kitai sebelah-belah niti jalai. Ambika banding di sepemanjai jalai kitai meda mayuh endar lambang terabai ba mua rumah ti besai tauka ba opis-opis perintah lalu bisi mega ba rumah-rumah orang. Sida dipeda bisi berasai gaga ngayanka lambang terabai ba mua rumah sida. Amat meh lambang terabainya semina pengias aja tang nya mandangka pengangkun ati bala Dayak di menua nya ngetanka identiti sida.  Dipelaba aku enti dibandingka enggau kitai di Sarawak ditu dia alai penyampau terabai ti dipandangka sida jauh lebih mayuh ari enggi kitai. Nitihka padah siku ari lecturer sida di Universitas Palangka Raya terabai tauka perisai endang siti ari identiti bansa Dayak di Kalimantan Tengah ti besai endar reti. Lambang terabai mandangka pengelikun. Kita begunaka pengelikun lalu terabai ulih ngelindung kitai ari penusah. Kelimpah ari lambang terabai siti agi lambang ba rumah-rumah di Kalimantan Tengah iya nya kayu ti besengkar dua ba ujung tulang perabung rumah sida. Kayu dua iti ti besengkar tu dikumbai sida resplang. Lebuh aku nanya ngagai bala nembiak ba Universitas Palangka Raya dia sida madahka resplang endang lambang architecture ti nyelai lalu semina bisi di Palangka Raya.
Kalimantan Tengah mega bisi mayuh sungai lalu ba tisi indu nengeri Palangka Raya bisi sebatang sungai ti dikumbai Sungai Kahayan. Enti diperatika ba kar menua nya dia alai Sungai Kahayan tu endang ngerenchah tengah-tengah menua Kalimantan Tengah ari tebing tasik lalu nyentuk ngagai entigis di ulu  ti tebal agi diwan bansa Dayak. Nyadi penyampau tubuh mensia ti nguan Palangka Raya enda mayuh kira ka 170 ribu aja. Iya nya jauh mit enti dibandingka enggau Pontianak, Samarinda tauka Banjarmasin. “Ditu nadai traffic jam” saut driver taxi ti nganjung kami ari padang bilun Tjilik Riwut ngagai indu nengeri Palangka Raya. Kedai alai meli barang baka shopping mall mega nadai mayuh. Enti di Pontianak bisi shopping mall ti besai baka Ayani lalu di Samarinda bisi shopping mall baka Lembusuana. Enti di bandingka enggau menua bukai ti udah alai nemuai baka nengeri Samarinda (Kalimantan Timur), Pontianak (Kalimantan Barat)  enggau Banjarmasin (Kalimantan Selatan) dia alai Palangka Raya endang siti ari sitak ti agi jauh di belakang dibanding enggau provinsi ti bukai. Taja pan nengeri mit sereta nadai mayuh tubuh tang Palangka Raya enda suntuk alai bebelika barang tanda pengingat kitai ti udah bisi neresa menua nya. Siti ari alai nya dikumbai sida Pasar Besar alai orang bejualka mayuh macham utai.         

Penemuai ngagai Dayak Cultural Festival Isen Mulang
Udah datai be endur diau ba bilik lumur 215, Amaris Hotel ba Jalan Parman ba nengeri Palangka Raya kami lalu keluar baru sereta nguji deka napatka siti alai orang ti mandangka main asal enggau adat Dayak di Kalimantan. Endur alai mandangka adat main asal ti dikumbai sida Tambun Bungai ti bisi siti endur tauka dewan ti chukup besai. Kesemua sitak tauka propinsi di Kalimantan Tengah endang bisi ngambi bagi dalam ekspo nya. Alai sida ti mandangka adat enggau main asal sereta kereja jari sida endang dibagi sereta ditusun nitihka sitak. Mayuh endar asil kerja jari bala Dayak dipandang sereta dijual ba ekspo nya. Ambika banding mayuh macham kain ti dikena ngaga baju bisi dijual, utai bukai baka tikai, tanggui ti diayam enggau rutan mega bisi dipandang lalu dijual sida. Mayuh endar tikai rutan ti diayam mandangka gambar pun pengidup tauka pokok kehidupan ti dikumbai sida “pokok garing”. Ekspo nya mega bisi mandangka main asal lalu pia mega penemu bansa Dayak ba bansa utai tumbuh ti ulih dikena ngubat mayuh macham penyakit. Endang sigi baka bansa Dayak bukai sida enda suntuk penemu ba senentang  utai tumbuh dalam kampung ti tau dikena ngubat penyakit. Penemu senentang guna utai tumbuh endang senipak enggau pengidup enggau asal bansa Dayak ti diau nguan menua kampung. Lebuh ti bejalai ngelingi alai ekspo nya aku mega tepedaka mayuh endar lambang burung kenyalang. Aku bisi ngerandau lalu nanya sida nama reti burung kenyalang ba bansa Dayak di Kalimantan Tengah. Sida madahka burung kenyalang nya burung “Raja Rimba” tauka dikumbai sida raja semua burung di kampung besai.    
     
Betang Tumbang Anoi
Nitihka pengingat orang di menua Kalimantan Tengah dia alai kena 14 hari bulan enam taun 1893 menya bisi siti pengawa bebaik ti di atur ba Rumah Betang Damang Batu ba sebengkah endur dikumbai  Tumbang Anoi. Nitihka pengingat sida dia alai bisi kurang lebih 1500 ikut bala tuai-tuai Dayak ari pulau Borneo bisi datai ngulu aum nya. Pengelama sida bejuraika jalai ti bebaik enggau diri sama diri nya kira  tiga bulan. Ari pemutus aum sida di Tumbang Anoi dia alai semua tuai-tuai Dayak setuju mutuska penemu ba tiga bengkah pekara. Tiga itu pekara tu dikumbai sida tiga “H” (hankayau, hanbunu enggau hantetek). Keterubah sida setuju deka ngetu belaban ngayau ngambi pala pangan diri. Kedua sida mega setuju deka ngetuka pengawa kayau anak entara sida sama sida. Ketiga sida mega setuju enda agi ngambi orang ti alah laban sida nyadika ulun. Aum tu endang sebengkah ari jalai bala tuai-tuai Dayak di menua Kalimantan ngetuka penyarut lalu ngaga pemaik entara bala Dayak ti nguan menuanya. Sida nemu enti sema sida enda ngetu bebunuh dia alai bansa sida ti lemi deka abis sereta pupus laban alah dibunuh sida ti kering sereta mayuh agi tubuh. Nitih ti dipadah bala pemansik ari Universitas Palangka Raya dia alai bala pengari ari Sarawak enggau Brunei mega bisi datai enggau baum ba Betang Tumbang Anoi. Enti kitai mansik cherita lama menua kitai di Sarawak dia alai kurang lebih maya nya kemari dia alai perintah Brooke di Sarawak bisi mega belabuh ngatur pengawa bebaik di Sarawak. Ambika chunto kena 4 lapan 1899 bisi pengawa bebaik di Baram ti dikumbai “Great Peace Making”.
 Lebuh ti bejaku bejadi seminar kami ba Universitas Palangka Raya kena 23 ari bulan lima tu tadi dia alai pengari Gabenor menua Kalimantan Tengah Bapak Ir.Basyuniansyah madahka tu meh kali kedua bala ari seluruh pulau Borneo gelumu di Palangka Raya. Iya madahka sekali tu orang ti datai ukai bala tuai-tuai adat Dayak tang bala pemansik enggau pengajar ba universiti ti bisi di Pulau Borneo ti bisi pengerindu mansik, adat asal, cherita lama mayuh pupu raban bansa di Pulau Borneo. Bala kami sebuat ti datai seminar iya nya ari Universiti Brunei, Universiti Malaysia Sabah, Universiti Malaysia Sarawak, Universiti Teknologi Mara Sarawak, Universitas Mulawarman di Samarinda, Universitas Lambung Mangkurat di Banjarmasin enggau Universitas Tanjung Pura ari Pontianak. Penyampau tubuh kami ti begelumu dia lebih seratus iko alai bejuraika penemu lalu bekenangka pansik ti dipejalaika ba universiti diri empu. Laban ti rindu deka nemu adat enggau penatai kitai Dayak enggau dalam agi dia alai aku sigi enda kala tinggal enggau seminar ba semua universiti ba pulau Borneo. Tu mega meri peluang alai bejuraika penemu lalu besilihka utai ulih ari pansik enggau pemansik ari universiti ti bukai. Aku agi ingat endar lebuh kami ti mansang seminar ngagai Universitas Mulawarman di Samarinda dia alai pejalai ngena teksi kira tiga jam ari padang bilun Sepinggan International Airport di Balikpapan ngagai indu nengeri Samarinda. Jalai mit sereta enda tentu nyamai ditengah endang ngasuh ati rawan. Lebuh seminar ba Universitas Lambung Mangkurat di Banjarmasin kami sebuat datai nyau tengah malam laban bilun ti laun angkat ari Jakarta ngagai Banjarmasin. Taja pan pejalai mar sereta pedis tang ati tepantup laban udah meda menua ti semina kala di dinga sereta dikenang dalam leka main enggau ensera kitai Iban.      

Museum Balanga tansang adat enggau pesaka Dayak.
Siti endur ti enda tau enda diabas lebuh bisi nemuai ngagai Palangka Raya iya Museum Balanga. Museum tu mayuh endar nyimpan pesaka enggau barang lama bansa Dayak ba menua nya. Penyauh Museum Balanga iya nya kira ka 2.5 kilometer ari nengeri Palangka Raya. Ngagai bala orang ti bisi pengerindu deka mansik penatai bansa Dayak dia alai museum tu mandangka mayuh macham utai ti tau ngerinduka ati kelebih agi senentang cherita lama. Dalam museum nya mega bisi gambar model rumah panjai alai bansa Dayak diau di Kalimantan Tengah. Kelimpah ari nya mayuh macham benda ti bisi dipedagangka di menua Kalimantan Tengah dulu menya mega bisi diayanka. Museum tu mega bisi nyimpan sebilah ilang ti chukup besai sereta bagas dikena lebuh maya bala Dayak agi ngayau menya. Museum Balanga mega bisi mandangka adat pemati bansa Dayak ti dikumbai Tiwah.
Siti ari utai ti balat ngerinduka ati iya nya lebuh ditusuika siti adat bekaul enggau jalai bansa Dayak di Kalimantan Tengah ngena adat ngatur orang ti jadi melaki bini salah serak. Nitih ti dipadahka pegawai ba museumnya dia alai enti sema orang bisi jadi salah serak dia sida endang deka diatur enggau adat sida awak ka menua endang kudi bebali. Retinya awak ka ai endang belinggang lalu tanah enda berenyang. Taja pa sida nadai besapatka ai lalu ngena darah babi tang sida ngembuan jalai ti nyelai dikena ngaduka orang ti jadi salah serak. Siti ari utai ti nyelai iya nya lebuh du iko orang ti jadi nya di asuh duduk atas kayu tigaga baka gamal baya. Udahnya seduai lalu dinahka asi dalam dulang babi. Seduai makai ari dulang lalu ukai ngena chapak. Seduai ti makai dalam dulang babinya enda tau nyeput ngena jari tang seduai enda nyalah-nyalah makai baka pendiau babi ti terus ngena mulut. Udah tembu seduai makai enggau adat bukai udah tembu dikereja nya baru seduai ulih diterima mensia mayuh. Seduai mega jadi melaki bini baka orang bukai. Kereban bukai ti dikena muai pemali mega deka dikeluarka seduai lebuh maya orang ti ngaduka adat seduai ti jadi salah serak. Tu endang sebengkah ari ukum ti berat dikena ngajar tauka ngukum orang ti jadi salah serak. Baka kitai Iban ditu bala Dayak di Kalimantan Tengah mega arapka ulah enggau pendiau mensia ti enda manah tau ngasuh dunya angat.
Munyi ti udah disebut enggau ngelansa di atas tadi iya nya sama bisi dipandangka dalam museumnya mega siti replica duku ilang ti naka iya pemesai sereta panjai. Nitihka padah  pegawai museum ti meri penerang duku ti asal agi disimpan suku juru sida iya empu laban sida enda setuju nyerahka duku nya ngagai museum. Taja pan dukunya semina replica tang pemesai enggai pemanjai duku ilang nya endang nitihka iya ti asal. Nyau enda alah tat ka agi ati dia alai aku minta pemendar megai lalu nantaika serangan duku ilangnya. Pegawai nya setuju lalu ngemendarka aku begambar ngimbai serangan duku ilang nya. Pemanjai serangan duku ilang nya jauh tinggi ari aku lalu pia mega mata iya ti panjai sereta besai. Dipelaba aku enti ilang nya dibiau nadai penusah iya bulih rawai empat tauka rawai lima.  
Museum Balanga endang mandangka mayuh macham tajau ti dijual pedagang luar ngagai  Kalimantan Tengah dulu menya. Lalu enti kitai beratika ari pemayuh tajau dia alai kitai ulih tepedaka sekeda ari bansa tajaunya bisi mega bisi dikembuan kitai Iban di Sarawak. Tu endang laban penatai kitai Iban dalam kandang enam ngagai tujuh ratus taun ti udah endang sigi ari menua Kalimantan. Aku mega nanyaka ni bagi tajau “singa raja” ngagai pegawai ti meri penerang ngagai kami. Enggau jampat iya nyaut madahka sida nadai ngena namanya. Taja pia siti ari utai ti sama enggau pengarap kitai Iban iya nya tajau besai endar reti ba bansa Dayak Ngaju. Tajau ukai semina dikena nyadika kereban alai nyimpan barang tang iya mega tau dikena bebayar tunggu enti sema kitai bisi ngereja pengawa ti salah. Ba kitai Iban tajau mega dikena nukar  mensia. Ngagai kitai ti bisi ampit macha bup Sengalang Burung tentu kitai ingatka cherita Serapoh ti nyilih anak Kantu ngena tajau.            

Cherita rayat
Bala Dayak Ngaju mega bisi ngembuan cherita ti nyau deka sama enggau jalai cherita kitai Iban ba senentang jelu baya. Lebuh ti mantaika keretas jurai senentang gambar baya ti mayuh diukir di Sarawak dia alai Pengarah Museum Sarawak, Mr Ipoi Datan madahka gambarnya besai endar reti ngagai bala Dayak di Sarawak. Siko ari pensyarah tauka dikumbai sida dosen ari Universitas Palangka Raya lalu nimbal sereta bebagika cherita bansa Dayak Ngaju di Palangka Raya ti belaya besai ngelaban baya. Pensyarah nya ti benama Tatau Wijaya madahka bisi siti cherita lama ngenang siko nembiak mit. Nasit nembiak tu enda manah lalu tukang tilik di menua nya madahka anak mit nya deka parai diempa baya. Laban ti irau ka nyawa anak iya dia alai apai enggau indai iya lalu mai anak iya nya pindah sereta diau ba endur ti jauh ari batang sungai enggaika diempa baya. Udah anak mit nya nyau mansang besai sebesai lalu baka bala nembiak bukai iya bisi pengerindu deka bemain enggau anak patung dikena iya seula-ula. Iya minta gagaka apai iya anak patung. Apai iya lalu ngambi kayu lalu ngaga anak patung gambar baya awak ka dikena iya bemain. Nyau kepuas iya ti bemain enggau anak patung nya tadi dia alai  sekali lebuh iya bemain enda mukai-mukai anak patung nya tadi lalu ninggang pala iya empu ti ngujungka iya enda benyawa. Udah utai tu nyadi nya baru apai iya ingatka pesan bala tukang tilik ti madahka anak iya deka mati laban baya. Apai iya balat endar ringat ngagai utai ti udah nyadi. Iya deka ngiga sereta munuh bala baya di batang sungai Kahayan di Palangka Raya. Nitihka cherita ti dipadahka bapak Tatau nya tadi apai nembiak nya bisi ngiga lalu munuh baya dalam pengelama tujuh hari tujuh malam lalu mayuh endar baya mati laban iya. Batang ai sungai Kahayan ngenjing mirah laban darah baya ti mati dibunuh apai nembiak nya tadi. Rindu endar kami ninga cherita bapak Tatu Wijaya lebuh iya ti nyelepak becherita udah bekau Mr Ipoi Datan mantaika keretas jurai iya. Udah bekau ninga cherita bapak Tatau Wijaya tadi aku mega ingatka siti cherita dalam bup Sengalang Burung alai anak orang siku ti benama Engga mati ditinggang ketebung digaga ari kulit baya laban Engga bisi ampit mungkal nganu bala baya. Baka pengarap lama kitai Iban mega bansa Dayak Ngaju arapka enti sema orang nya dikachau baya ukai salah baya tang laban orang nya bisi pemuni. Ari cherita tu tadi kitai endang bisi ngembuan pengarap enggau adat ti nyau deka sama enggau bala bansa Dayak Ngaju di menua Kalimantan Tengah. Ari ni penatai cherita ti nyau deka sama bakatu patut dipansik kitai dalam agi.                 

Adat Tiwah enggau Pengarap Kaharingan
Siti ari adat ti agi meruan dikembuan bala Dayak Ngaju ti agi ngemeranka pengarap lama ti dikumbai sida Kaharingan iya nya adat ti besangkut paut enggau pemati. Adat tu dikumbai sida iya Tiwah. Pengarap lama Kaharingan tu mayuh endar bechampur enggau pengarap Hindu. Reti Kaharingan ba jaku bansa Dayak Ngaju iya nya “pengidup”.Nya alai jalai sida ngintu pengarap enggau adat endang agi mayuh bechampur enggau pengarap Hindu. Pengarap lama Kaharingan tu belabuh dikelala lebuh maia perintah Jipun ba taun 1945. Petara pengarap Kaharingan tu dikumbai Ranying/Ranying Hattalla tauka Alatalla. Lalu nitihka sida ti agi ngemeranka pengarap tu dia alai pengarap Kaharingan tu endang udah bisi kenyau ari dunya nyadi suba. Nya alai ba pengingat sida ti ngemeranka pengarap Kaharingan dia alai pengarap sida endang lama udah dititi ditali sida.
Tiwah tu tadi iya nya pengawa enggau adat nganjung semengat orang ti udah parai ngagai siti endur ti dikumbai sida Lewa Tatau Rumpang Tulang lalu alai tu iya nya ba serak langit ti ketujuh. Semengat orang ti udah mati dikumbai Salumpuk Liau lalu semangat tu enda tau enda dianjung ngagai petara iya nya Hattalla. Tiwah dikereja nyentuk ngagai pengalama empat puluh hari.  Sida endang bisi tukang sampi tauka lemambang ti diasuh nganjung semengat tu tadi. Nitihka pengarap sida semengat orang ti mati deka dianjung nengah empat puluh serak ambun, meraka sungai, niki bukit, meraka tasik, meraka telaga, nengah jematan lalu enti pengawa Tiwah salah tusun lalu enda diatur enggau betul dia alai semengat iya ti parai tau tesat. Lebuh ti ngaduka pengawa tu mayuh mega penti ti enda tau enda dititih laban enggaika iya tau ngenusah bala kaban belayan ti agi idup. Belanja dikena ngaduka Tiwah endang besai. Ambika banding barang pemakai baka, sapi, babi, manuk enggau uti bukai endang mesti disediaka magang. Pengawa tu kurang lebih baka pengawa Gawai Antu ba sekeda endur menua kitai Iban di Sarawak.

Penutup
Bilun ti dikena mulaika diri ari Palangka Raya ngagai Jakarta laun angkat. Sekali tu lebih dua jam laun. Kami masuk bilik lumur 210 Hotel Ibis Jakarta Tamarin ba Jakarta Pusat kira jam tujuh malam. Sambil merening ngagai Spanish Embassy ti semak nya aku lalu belabuh ngeranjai sekeda ari utai ti udah dipeda di Palangka Raya. Taja pan udah malam tang kereta bajai endang agi benung baka jayap ba jalai raya di Jakarta Pusat. Kelimpah ari ti meda menua ti baru penemuai ngagai sekeda indu nengeri menua Indonesia di Pulau Borneo baka Pontianak, Banjarmasin, Palangka Raya enggau Samarinda endang balat ngemuaska ati lalu asai ti diambi mimpi. Tu meh peluang meda lalu belajarka adat enggau main asal mayuh macham bansa ti bisi nguan pulau Borneo. Bala pemansik ari universiti bukai mega mantaika asil pansik sida. Nya meh ngasuh penemuai ti bakatu mayuh agi mai penguntung. Mayuh endar nama nengeri tauka sungai ti bisi dikena pansa lebuh bejalai di Kalimantan endang bisi dalam leka main enggau cherita lama kitai Dayak. Udah meratika gaya menua enggau pengidup orang ba menua Kalimantan ti udah diteresa bala aki ini kitai beratus taun ti udah dulu menya dia alai asai ati berasai puas. Menua Kalimantan baka Banjarmasin, Samarinda, Palangka Raya enggau Pontianak endang tau alai kitai belabuh mansik penatai aki ini kitai dulu menya laban ba sekeda endur di menua tu agi bisi bekau abi kaki enggau abi jari sida kelebih ba adat enggau cherita tuai ti mayuh sama.   



Tiada ulasan:

Catat Ulasan