Rabu, 15 Ogos 2012

Penerang sejarah enda tau sepeneka ngubah: Dr. Neilson



Penerang sejarah enda tau sepeneka ngubah: Dr. Neilson

Utusan Borneo 
Posted on September 5, 2011, Monday
KUCHING: Pengangkun sereta penaluk ati raban se­dadu, polis enggau renjer ke udah lesi bebadi maya betem­puh enggau munsuh ngetanka menua nya mih orang ke patut dikelai ‘hero’ tauka bujang berani menua.
Sapit Dekan Fakulti Sains Sosial, Universiti Malaysia Sarawak (UNIMAS), Dr. Neilson Ilan Mersat madahka tu mih penerang sejarah ke enda ulih diubah nitihka ati tauka runding politik kitai.
Iya madahka kominis ngeregau pengelikun maya menua siga suba ngam­bika sida tau nirika perin­tah komunis lalu nyeliahka menua tu ari dipegai nitih atur demokrasi.
“Kominis enda pechayaka pengawa bepilih ngena keretas undi nitihka atur demokrasi tang sida iya dekaka kuasa ari munchung senapang.
“Kominis deka merintah nengeri ngena jalai ke kasar tauka dikumbai kitai perintah ‘kuku besi’,” ku Neilson.
Ketuai komunis Mao Tse Tung suah nyebut sereta begendangka genteran jaku ti madahka kuasa datai ari buluh senapang tauka “Po­litical power grows out of the barrel of a gun.”, Jaku tu besai bendar reti enti kitai merati lalu meretika ideologi enggau sejarah bala kominis ti deka megai kuasa ba dunya tu, ku iya.
Neilson mansutka penerang tu lebuh nimbal penemu ke dipansutka Sapit Presiden PAS Mohamed Sabu ke madahka raban komunis ke udah nyerang sereta munuh polis ba Bukit Kepong nya orang ke patut dikelai ‘bujang berani’ menua.
Sabu mansutka jaku nya lebuh bejaku ba Tasek Gel­ugor, Penang kena 21 Ogos 2011 lalu penerang ari iya nya udah ngemediska ati mayuh ketuai ke dulu suba nyengkaum Menteri Besai ke dulu suba Tun Dr. Mahathir Mohamad.
“Mayuh menua kominis udah runtuh ketegal ari sistem ekonomi enggau ideologi ti enda ulih mutarka penusah rayat.
Ba Malaysia bejuta duit udah dipelanja ba pengawa matih sedadu enggau meli perengka perang dikena ngelaban kominis lalu sapa aja ke deka ngerembaika penemu kominis deka ditangkap laban ideology komunis belaban enggau perintah demokrasi, ku Neilson.
“Ribu nyawa raban sedadu engau polis udah lesi bebadi maya ngetanka menua ari serang kominis lalu sida tu mih ke patut dikelai ‘bujang berani’ menua.
“Penerang sejarah nya enda ulih diubah sepeneka ati,” ku iya.


Read more: http://www.theborneopost.com/2011/09/05/penerang-sejarah-enda-tau-sepeneka-ngubah-dr-neilson/#ixzz23f3nzLkj

Tiada ulasan:

Catat Ulasan