Rabu, 19 Disember 2012

Titi pengeransing penyemerai jalai penyulut Utusan Borneo 20.12.2012







Titi pengeransing penyemerai jalai penyulut

by Chris Bishop. Posted on December 20, 2012, Thursday
Angkunka pelajar, fokus sereta nadai kuing bukai lebuh mendingka pengajar, sengkuar pemujur
KUCHING: Fokus mendingka ajar pengajar maya dalam kelas sereta ngungkupka awak enda kurang ari dua jam macha bup di rumah penentu pemujur Howard Deri anak Neilson Ilan teulihka 7A ba peresa Penilaian Menengah Rendah (PMR) 2012.
Seiku ari nembiak sekula SMK Penrissen No. 1 lebuh dikerandau Utusan Borneo madah pengaga nerima pemutus ke dipansut pagi kemari taja pan enda nyadang diri tau teulih 7A.
Howard ti ngembuan juluk deka nyadi seiku ‘scientist’ madah pekara ti pemadu beguna maya belajar iya nya anang sesekali lenyau fokus sereta meretika topik ke diajar.
“Meretika topik ke diajar sereta anang lenyau fokus maya dalam kelas deka nentuka kitai ulih nguasa tiap matapelajar enggau manah.
“Aku mega ngungkup awak enda kurang ari dua jam macha bup di rumah kelimpah ti nurun tuisyen sepengelama dua jam ba palan tuisyen ti besemak enggau rumah maya malam hari,” ku iya seraya madah, semua pekara nya patut dikereja enggau penuh disiplin.
Rinduka matapelajar sejarah, Howard madahka peransang ari apai indai, kaban belayan, kaling sereta ati ti deka meda diri sama tikas enggau orang bukai ti landik dalam pelajar nyadika pengeransing iya netapka ati diri deka belajar bebendar.
“Aku seruran mekit diri ngagai tikas ke pemadu tinggi ulih dijapai ke alai aku mega ngembuan juluk deka nyadi tauka disengkaum dalam raban orang ti bepenemu,” ku iya.
Iya ti ngembuan juluk deka nampung pelajar renggat universiti di menua tasik madahka rindu agi nampung pelajar pom empat di SMK Penrissen No.1
Ku iya,…asal ati deka belajar kitai deka bulih pemujur lalu nya enda ngira ba dini kitai besekula.
Howard teulihka pemutus A ba semua 7 matapelajar ti diambi iya nyengkaum Bahasa Melayu, Bahasa Inggeris, Matematik, Sains, Sejarah, Geografi enggau KHB-Perdagangan dan Keusahawanan.
Howard disempulang apai indai iya, Sapit Dekan Fakulti Sains Sosial UNIMAS Prof Madya Dr. Neilson Ilan Mersat enggau Runi Sylvester ngambi pemutus nya pagi kemari.
Ba PMR 2012, lapan iku pelajar SMK Penrissen No. 1 bulih 7A sereta 3 iku pelajar bulih 8A.

Nembiak universiti bisi pengelandik nyadi ketuai 18.12.2012

 

 

Nembiak universiti bisi pengelandik nyadi ketuai

Posted on December 18, 2012, Tuesday
KUCHING: Atur ngemendarka nembiak universiti ngaul diri dalam pengawa politik luar kampus sebengkah pemutus ti manah tang ukai ngemendar sida iya nyadi chalun.
Menteri Muda Perengka Guna Mensia Mayuh Datuk Dr Stephen Rundi Utom madah sigi enda disangkal bisi sekeda nembiak universiti ngembuan pengelandik nyadi seiku ketuai.
Tang iya ke nyadi isu ditu iya nya…ulih tauka enda raban nya (nembiak) megai tanggung pengawa nyadi kaban kunsil nengeri tauka kaban parlimen enggau manah.
“Ba runding aku, penemu ngemendarka nembiak universiti ngaul diri enggau serius dalam politik nyengkaum nyadi chalun bisi pemanah enggau pengurang.
“Pemutus tu manah ketegal kitai enda nagang sebarang gerempung tauka orang dalam komuniti ngenataika penemu.
“Tang maya pengawa bepilih, kitai deka begunaka lebih ari pengulih enggau kredebiliti enti deka nyadi seiku ketuai ti manah,”ku iya.
Dr Rundi ke mega Sekretari Besai Parti Pesaka Bumiputera Bersatu (PBB) sereta ADUN Kemena nambah, sebrang orang ti deka bediri ba pengawa bepilih patut nyikap diri dalam semua pekara ke nyengkaum ngembuan pemisi ti meruan sereta iya ke bukai.
Ku iya, sapa aja ti ngining deka nyadi chalun kelebih agi nembiak universiti patut berunding panjai lalu ukai semina bediri ketegal ti nitihka peneka ati laban nya tau ngeruga pengidup sida iya jemah.
Iya ngelalau raban nembiak universiti anang ngerunding deka nyadi chalun tang dulu ngemeratka pengawa belajar ti tau nyamin pengidup ti menyana jemah.
“Sida enda patut begeguai ketegal awak ungkup sida ti ngembuan pengelandik nyadi ketuai deka datai jemah ila,”ku iya lebuhka ngenang jaku Menteri Pelajar Tinggi Datuk Seri Mohamed Khaled Nordin di Putrajaya Hari Lima tu tadi.
Ba kaul ke sama, raban akademik Prof Madya Dr Neilson Ilan Mersat sepenemu enggau Dr Rundi senentang kaul nya.
“Sebaka munyika runding Dr Rundi, aku ngembuan runding ti bechampur senentang pekara tu ke alai pemutus nya manah ungkup nembiak ti ngaul diri dalam politik ngambika teulihka peneleba tang pemutus tu mega deka ngeruga fokus sida iya dalam pelajar di universiti,”ku iya.
Iya nambah, enti nembiak deka ningaka jaku ajar iya. . .aku ngansak sida iya nembuka dulu pengawa belajar di universiti lalu ngiga pengawa ti manah ti deka nyamin pengidup jemah. Udah nya baru tau ngerunding ngaul diri dalam politik.
“Pekara ti suah ditanya aku ngagai nembiak pelajar iya nya. . .Enti sida iya dipilih, nama pekara ti ulih diberi sida iya ngagai orang ngundi..?
“Siti pekara ti patut dikeingat iya nya . . dalam politik enda semua bejalai manah nitihka perambu,’ku iya.