Howard at Washington DC

Mesyuarat Majlis Pembangunan Sosial Sarawak 27.2.13

Bukit Sibau Write-up 2011

Bukit Sibau

“Saya berharap jawatankuasa ini dapat menyelesaikan tugas dengan baik dan dalam jangkamasa yang ditetapkan” , ku Sapit Menteri Besai menua Malaysia Tan Sri Mahyudin Yassin. Bala kami sebuat sama nadai nimbal penemu iya tang sama bala tuchum  malik ngagai pangan diri laban nemu tanggung pengawa nya berat lalu tambah mega timpuh ti diberi semina setaun aja. Emeritus Profesor Tan Sri Khoo Kay Kim ti duduk sepiak aku lalu nguing sereta senyum ngagai aku. Iya tu siku ari orang ti chukup landik senentang cherita lama tauka sejarah menua kitai di Malaysia. Pedis endar deka nangkap reti senyum nya tang dipelaba aku iya meri peransang ngagai aku. Tan Sri Mahyudin mansutka jaku nya lebuh ti betemu enggau Jawatkuasa Khas Mengkaji Kurikulum lalu nyuaka sijil dikena maduka kami ngereja pengawa ti dikumbai sida “Jawatankuasa Khas Mengkaji Kurikulum Sejarah”. Sebedau betemu enggau Timbalan Perdana Menteri kami sebuat udah disadungka orang semua buku teks ti dikena ngajar sejarah ari Tingkatan 1 ngagai Tingkatan 5. Lebuh ti ngebakka bup Tingkatan 2 (Bab 7)  aku tepedaka siti bagi ti ngenang pasal Rentap. Lebuh macha cherita iya dalam buku teks nya aku ingatka diri ti endang bisi ati deka ngabas lumbung Rentap baru taja pan udah bisi nemuai kia ba taun 1973 menya. Aku berasai temegah laban Rentap siku ari tuai “tempatan” (local leader) ti berani ngelaban raja maya nya menya. 

Datai di Kuching aku lalu nandu niat ati ti deka nemuai ngagai lumbung nya ngagai Dato Sri Edmund Langgu. Kebuah pia laban Dato Sri bisi kala ngenang pengingin ati diri ti deka nemuai ngagai lumbung nya. Iya madahka perambu aku ti deka nemuai ngagai Bukit Sibau nya chukup manah lalu iya mega madahka diri sama-sama deka ngenataika diri ngagai lumbung nya. Ba Dato Sri Edmund Langgu penemuai ngagai lumbung Rentap besai endar reti. Kebuah pia laban Dato Sri iya nya siku ari tuai kitai Iban ti  ngembuan pengering enggau pengeliat ati seruran deka ngidup lalu ngerembaika adat, cherita tuai enggau main asal kitai Iban. Awakka pejalai kami sebuat lanchar agi dia alai kami minta saup KBC Event Management ti betuaika Homery Enchan ngatur penemuai nya. Sida ngaduka program lalu ngangau bala pengarang berita.    

Kena 23 Julai 2011 bala kami sebuat betemu ba simpang Pakan. Kami ngetu beranti seraya ti ngirup ba Pakan Café. Sjn Lidam sereta enggau dua iko peturun Rentap iya nya Subang enggau tuai Rumah Jeluing ari Ulu Wak sama mega udah bisi datai dia. Bala bukai ti ari Miri enggau Bintulu mega sama udah datai. Alai nya manah endar endur beranti. Panas naka iya penerit sari nya lalu segelas ai chelap diirup ba Pakan café udah ngasuh ikak nyau kurang agi. Kami betemu dia kira pukul 12 tengah hari. Penyampau tubuh kami ti datai dia bisi tiga puluh iku. Bala ti bisi mai camera enggau video endang nadai muai peluang ngachitka kamera sida ngambi gambar. Cikgu Isa Lee ti deka ngarang cherita dalam siti bup cherita mega bisi dipeda ngerawis ba bup mit ti disandik iya. Pia mega reporter Christopher Bishop ari Utusan Borneo  sama dibai nyempulang kami sebuat nemuai ngagai Bukit Sibau awakka iya ulih ngaga lalu ngeluarka  cherita pasal penemuainya.  Dato Sri Edmund Langgu majak berandau enggau peturun Rentap iya nya Subang enggau Tuai Rumah Jeluing ti sama deka nguluka kami ka Bukit Sibau. Pengerindu ti betemu enggau berandau ba Pakan Café ba simpang Pakan enda ulih ditundaka. Kira pukul 1245 kami lalu belidar mupuk. Siku ari bala kami ti sama bisi main perengka GPS (global positioning system) lalu ngaduka perengka iya awakka kami nemu penyauh pejalai kami lalu pia mega deka nemu peninggi Bukit Sibau ti alai lumbung Rentap.  

Angkat ari simpang Pakan kami lalu niti jalai Pakan nyentuk ngagai simpang jalai Ulu Wak. Gaya jalai ngagai ulu Wak chukup pedis ditengah lalu enti kereta ukai bansa 4 Wheel Drive endang dipelabaka enda ulih mansa. Mayuh amat lubang ti dalam lalu jalai balat lichin ti tau ngasuh motor mit lekat. Kami sebuat ngetu ba SK Nanga Kedup berantika bala. Enda mukai-mukai sebuah kereta ti dikena raban kami enda ulih mansang laban tepagang ba luchak. Sebuah kereta ti dulu nikal baru ngambi bala penumpang ba kereta ti enda ulih mansang agi nya tadi. Panas agi balat terit ba alai kami negtu ba tisi kelang sabung ba SK Kedup. Tuai Rumah Wilfred Ullie enggau sekeda ari bala nembiak iya mega udah bisi dipeda nganti kami sebuat dia. Sida seraban endang sama deka enggau kami niki ngagai lumbung Rentap.

Kami berangkat ari nanga Kedup udah bala sida ti tepekul kereta datai dibai Sjn Lidam enggau bala iya. Jalai ngagai tuchung Bukit Sibau nyau majak mar ditengah lalu bisi endar pengerepa laban jarang ditengah orang. Rumput  berupai tinggi tumbuh ba tengah jalai ti mandangka jalai nya jarang ditengah. Enti ari ujan jalai nya endang tetap lichin laban nadai batu. Kami sebuat datai ba alai engkah kereta kira pukul dua setengah lemai lalu mata ari ending agi terit endar dipeda. Bala lalu bebantai sereta mai sekeda ari barang pemakai ti deka dikena ngintu diri ba lumbung lalu perengka ti deka dikena miring. Bala kami sebuat ti endang bisi mai baju burung mega lalu masukka baju burung sida. Rindu endar meda penyigat bala kami sebuat ti ngena baju burung niki Bukit Sibau. Unggal aku siku ari Consulate Brunei Darussalam mega lalu masukka baju burung iya. Aku lalu nundi iya madahka iya sigi tau nyadi Iban di Sarawak. Pejalai ari alai ti engkah kereta bisi kira sepuluh minit. Pejalai asaika jauh laban nanjak Bukit Sibau. Jalai nyamai alai bejalai laban tawas semina pedis ditiki laban renjan. Kami neju  enda lama ba alai ngetu siti. Beratika utai tumbuh ti bisi idup ba tuchung Bukit Sibau. Aku lama beratika tunga menua kami ke Kabo ari endur nya laban Bukit Sibau tu endang entara menua orang Kabo enggau Sarikei. Dato Sri Edmund Langgu mega bisi berati lalu ngerara sekeda ari kayu enggau utai tumbuh bukai. Iya bisi berandau enggau siku ari bala kami sebuat ti endang landik senentang kayu enggau utai tumbuh dalam babas. Penuduk Bukit Sibau dalam kar dunya ditetapka ba N 01” 50.064 enggau E 111”31.123 ngena GPS. Sapa ti bisi ati deka ngiga alai tu dalam kar dunya ngena Google map tetap ulih tetemuka endur Bukit Sibau.

Kami lalu majak ngansak semak ngagai tuchung Bukit Sibau alai lumbung Rentap. Dato Sri Edmund Langgu iya nya orang ti pengabis dulu lalu iya bisi didinga mansutka leka sampi madahka penatai kami. Udah semua bala datai ngelingi lumbung nya dia alai bala lalu belabuh deka miring. Sekeda ari bala kami  belabuh nebas ensiang lumbung nya. Miring nya siti ari jalai kitai masa orang ti digagai kitai kelebih agi orang baka Rentap laban iya endag ditemu tampak rita jelai nama enti dulu menya. Piring dipenyadi enggau turun semilan lalu semilan iti. Perengka piring endang bisi disediaka peturun Rentap iya nya Subang seduai Tui Rumah Jeluing. Udah tembu miring dia alai piring nya tadi lalu dibiau enggau manuk sabung biring ti dibai Tuai Rumah Jeluing. Bala ti enggau miring endang bisi ampit bebiau magang. Kami ngasuh Dato Sri bebiau dikena nutup biau kami sebuat. Laban ti ngembuan pengelandik dalam pengawa bebiau dia alai rindu endar kami sebuat ti datai dia ninga leka biau leka kangau iya.

Udah tembu miring dia alai kami sebuat lalu ngemataka bala uchu peturun Rentap baka Tuai Rumah Jeluing enggai sida bukai nanggung tangkup entubung iya. Bala ti baru datai kia endang bepeluang meda rangkah tulang niang Bujang Berani kitai Iban enggau semak agi. Bala ti bisi kamera endang enda ngetu ngachitka kamera sida. Sekeda ari bala ti datai mega bisi dipeda nibarka duit ngagai dalam entubung Rentap. Tu meh siti ari jalai kitai Iban masa sereta minta tulung minta pandung orang ti udah lama midang sulai baka Rentap.

Nya kelama ti udah ba tuchung Bukit Sibau dia alai bala kami sebuat mega bebai makai. Perengka makai endang bisi dibai bala Sjn Lidam enggau Tuai Rumah Wilfred Ullie laban endang nemu bala deka merarau ba tanah sarinya. Kenyang endar kami sebuat makai dia laban asi pulut lalu pia mega lauk ti dibai sereta disediaka Sjn Lidam enggau bala iya chukup nyamai. Endang sigi baka enti kitai ngintu diri dibabas dia alai peneka kitai makai ni macham pemakai endang jauh ngelui ari peneka makai di rumah. Manuk pansuh enggau kasam babi endang lauk kitai Iban ti chukup nyamai.

Udah bala badu makai dia alai bala reporters ti bisi enggau nyempulang kami lalu bisi ngerandau tauka  interview  Dato Sri Edmund Langgu nanyaka penemu iya senentang lumbung nya. Iya madahka pengawa ti ngaduka lubungnya suba sigi manah lalu perintah agi patut ulih ngemata sereta nyaga lumbung nya awak ka nyamai alai orang nemuai tauka datai. Dua iku peturun Rentap iya nya Subang enggau Tuai Rumah Jeluing mega bisi ditanya bala reporters senentang cherita lama ti ditemu sida senentang Rentap. Bala bukai bisi majak ensiang ngelingi kubur lalu bisi mega sida ti meratika rampa menua enggau tanah ti ngelingi lumbung Rentap nya. Bala nembiak ti enda kala meda lumbung Rentap endang sigi gaga ati laban kelimpah ari ti belajarka pemerani Rentap ba bup ba sekula diatu sida ulih meda “batang tubuh” Rentap empu taja pan iya nadai idup agi sereta enda ulih enggau berandau. Ketegal ari ti ulih ngindik ka kaki ba lumbung rentap udah besai endar reti ngagai nembiak sekula. Pia mega ngagai bala orang ti besai tuai ti enda kala nemuai ngagai lumbung Rentap sida mega berasai gaga sereta puas ati.

Rentap udah mujur mansutka nama diri dalam sejarah tauka cherita menua kitai Sarawak laban iya ngembuan ati ti kempang ngelaban raja lalu enggai nundukka sida taja pan iya alah ba Bukit Sadok. Semengat ti kering baka tu endang utai ti dipinta sereta tau ditunda tau diselada bala kitai Iban lebuh ti ngidupka diri di dunya tu ti mayuh macham penguji. Nama Rentap endang deka dikingatka orang mayuh ukai semina di Sarawak tang mega di Malaysia. Iya tau dikumbai “local leaders” tauka “pejuang tempatan” ti berani ngelaban orang ti bisi kuasa. Lebih agi ari nya iya mega udah besamaya enggai betemu enggau orang kulit putih nyentukka iya parai.  Semengat enggau pemerani baka enggi Rentap mega bisi ditunda sereta dikembuan sekeda bala Bujang Berani kitai Iban ti tebilang di Malaysia.  Aku endang agi ingatka penemu Bujang Berani kitai Iban, Kanang anak Langkau lebuh aku ti interview iya ba taun 2008 suba. Iya nyemetak endar madahka pemesai reti ngembuan pemerani kelebih agi lebuh sida ti berambunka nyawa ngetanka menua enggau bansa kitai di Malaysia.

Renggat ti kedua penemui kami sebuat sekali nya iya nya ngetu bemalam ba rumah  Tuai Rumah Wilfred Ullie di Nanga Dendang Ulu Wak (baca GPS ba senentang rumah panjai Nanga Dendang iya nya N01’52.004 enggau E111’31.494).  Penyauh lumbung Rentap ari rumah panjai nya kira ka 16 kilometer tauka 10 batu. Taja pan program asal sigi enda bemalam tang ari pinta Tuai Rumah Wilfred Ullie enggau bala nembiak iya dia alai kami sebuat ngetu bemalam ba rumah panjai sida. Sambut enggau basa Tuai Rumah Wilfred Ullie enggau sida serumah ngagai kami ti baru datai naka iya pemesai. Kami ditikika ngena babi panjab lalu Dato Sri diberi basa bejaku lalu ngayang babi panjab sida. Babi mati enggau adat sigi alas ngerang.  Lebuh ti niki rumah kami sebuat sama dibai  bejalai niti rumah panjang sekali besundang.  

Pengawa kami malamnya ditampung udah badu makai. Aku dipaduka bejaku meri penerang nagagi apai indai enggau nembiak bakani jalai sida minta masuk nampung pelajar ngagai universiti. Dato Sri meri lecture senentang jalai ngetanka adat enggau main asal kitai Iban. Batang penemu ti dipansutka Dato Sri nyengala terang lalu bala ti ninga mega berasai tepantup. Abis randau dia alai pengawa main asal bukai mega bisi dipansut. Keretubah iya pengawa main asal ngajat alai sapa ti nemu ngajat diasuh ngayanka pengelandik sida. Mayuh endar bala mandangka pengelandik diri ngajat. Abis pengawa ngajat dia alai jalai tundi bukai baka numbangka ranyai mega bisi dikereja. Tu meh sekeda ari basa bala rumah panjai ngagai kami ti datai dia. Abis main pengawa tradisional dia alai pengawa moden baka betanda, belagu ngena karaoke, betanda poco-poco mega bisi dipandangka malamnya. Pengawa diatur endang nyentukka siang lalu bisi sekeda ari bala kami endang nadai mejamka mata nyentuk ngagai tawas.

Penemuai nya sigi besai endar reti ngaga bala kami. Keterubah iya laban kami ulih datai meda lumbung Rentap. Ba aku ti nyadi siku ari kaban dalam Jawatankuasa Khas Sejarah dia alai penemuainya chukup beguna laban iya nambahka penemu aku senentang siku ari Raja Berani kitai Iban iay nya Rentap. Kedua, bala ti enggau mega ulih meda main adat tradisional ti dikena baka niki ngena babi panjab, miring ba lumbung Rentap, bebiau enggau main asal baka ngajat. Dato Sri mega bisi madahka pemuas ati diri laban udah bisi peluang niki Bukit Sibau. Dua taun ti ka udah iya bisi udah bemalam lalu niki Bukit Sadok ti alai Rentap ngenan menya. Dato Sri bisi ngenang penemuai kami tu ba radio dalam Program Buah Randau. Cherita senentang penemuai tu mega bisi dua kali udah pansut dalam Utusan Borneo lalu pia mega ba Kenyalang. Terima kasih enggau puji ngagai Tuai Rumah Wilfred Ullie enggau sida serumah ti udah chukup basa enggau sambut enggau kami sebuat. Pia mega terima kasih dituju ngaga Sjn Lidam ti udah bebendar kiruh ngatur program penemuai kami ngagai lumbung Rentap lalu bemalam ba rumah panjai sida di Nanga Dendang Ulu Wak. Kami mega meri puji sereta terima kasih ngagai Tuhan ti udah ngemata nyaga ngiring ngembing kami dalam sepemanjai jalai penemuai nya kemari.        

Dikarang : Neilson Ilan Mersat                   

           

Pemanah basa sereta pemajik bala nembiak Tuai Rumah Wilfred Ullie nyambut bala temuai ti datai ngena ngepan Iban

Jalai ngagai Lumbung Rentap ti kelalu pedis ditengah 

Begambar bebala mayuh ka  pengingat ba Lumbung Rentap

Dato Sri Edmund Langgu begambar enggau bala mayuh udah badu miring.

 Raban ti sama bisi enggau nemuai ngagai lumbung Rentap

Tuai KBC Event Management, Homery Enchan nyuaka tanda pengingat ngagai Sjn Lidam dikemataka Tuai Rumah Wilfred Ullie anggau Dato Sri Edmund Langgu ba rumah panjang Nanga Deandang (24 Julai 2011).

Perengka Globa Positioning System ti mandangka endur enggau peninggi Bukit Sibau (N 01’ 50.064 enggau E 111’31.123). Peninggi ba tuchung Bukit Sibau iya nya 270 m.

Dato Sri Edmund Langgu benung bejaku sebedau ngayang babi panjab ba rumah panjai di Nanga Dendang. Sama bisi dipeda ba gambar iya Cikgu Jamban (dua ari kiba) enggau Tuai Rumah Wilfred Ullie (tisi kanan). 

Batu Pengingat Rentap ba tuchung Bukit Sibau

Sida Tuai Rumah Wilfred Ullie serumah ti sama mandangka sambut ti pemadu manah. 

Rumah panjai Tuai Rumah Wilfred Ullie, Nanga Dendang, Ulu Wak, Sarikei. 

FRGS Budget Percentage

COST CATEGORY	RECOMMENDED FUNDING (RM)
Vot 11000 - Salary and Wages
Vot 21000 - Travelling and Transportation	40%
Vot 24000 - Rental
Vot 27000 - Research Materials and Supplies
Vot 28000 - Maintenance and Minor Repair Services
Vot 29000 - Professional Services	10%
Vot 35000 -  Accessories and  Equipment	40%
TOTAL

Randau pemansang jaku Iban di Grand Mag. 3.2.2013 Kuching.