Bansa Iban ringatka penerang ‘Kanang Bukan Hero Sebenar’

by Chris Bishop. Posted on January 8, 2013, Tuesday

DR. NEILSON

Sida melabaka blogger nya kurang basa sereta ngembuan ideologi kominis
KUCHING: Bansa Iban enda lantang ati sereta ringat ketegal penerang ke ma­dah, ‘Kanang Bukan Hero Sebenar’ ti dipansutka blog penyakal suarapakatan­rakyat.com.
Penerang nya asai ke nge­lanyai sereta ngemelika bansa Iban Sarawak ti ngelama tu endang muji, nyagu sereta ngemesaika Datuk Temeng­gung Kanang anak Langkau seiku Panglima Perang Bu­jang Berani, penerima midul ke mai gelar pemerani tikas pemadu tinggi di menua Ma­laysia, Seri Pahlawan Gagah Perkasa (SP).
Sapit Dekan Fakulti Sains Sosial Universiti Malaysia Sarawak (UNIMAS) Prof Madya Dr. Neilson Ilan Mersat madah, penemu nya berindik ari penyaru ketegal ari pansik ti kelalu mabu sereta enda meretika sejarah menua kitai Malaysia.
Ku iya, penemu ti bansa nya ukai semina ngerichau pengingat rayat tang lebih agi ari nya mandangka orang ti nulis enda nemu ngenang pemanah enggau tulung orang bukai baka ti udah dipandan­gkan Datuk Kanang nengah pemerani iya.
Kelimpah ari nya, tambah iya. . . penemu ti baka nya enda patut dipansutka maya diatu ketegal bala kaban belayan enggau bala Iban di Sarawak benung teguran tauka tegepang ketegal ari pemati ngenyit Kanang.
“Orang ti mansutka penemu enggau orang ti ngempu blog nya tau dikumbai kitai kurang basa sereta nadai adat ketegal enda bebasa ke orang ti diting­gang penusah lebih agi raban sida Datuk Kanang sebilik.
“Penemu ti bakanya mega udah ngelanyai sereta ngeme­lika bansa Iban Sarawak ti ngelama tu endang muji, nyagu sereta ngemesaika Datuk Temenggong Kanang seiku Bujang Berani menua ke pegari,” ku Neilson.
Neilson ke enggau dalam Jawatankuasa Khas Buku Teks Sejarah Malaysia lalu udah kala ngaga Dokumentari Kanang anak Langkau ungkup RTM nyerumba atur pengawa 50 menua udah merintah diri, mega madahka penerang nya udah ngemaruhka pangkat (SP) enggau basa ti diberi perintah menua Malaysia ngagai Datuk Kanang ketegal iya ti udah berambunka nyawa ngetankan menua ari dikeruga munsuh.
Iya madah penulis blog patut nulis enggau runding ti dalam sereta ukai ngerichauka utai nitihka peneka ati enggau pansik ti kelalu pabu.
“Penulis tu mansutka pen­emu ketegal sida enda nemu sejarah sekalika semina rindu neritka rekung mutar belit sereta bekelikuhka sejarah enggau ngelimpangka rund­ing mensia mayuh.
“Enti disagam enggau dalam agi . … kada enda sida tu nyimpan penyinu ngagai ideologi munsuh maya nya menya, ianya ideologi kominis ti dilaban bala soldadu Ma­laysia baka Datuk Kanang,” ku iya.
Pengawa kitai Iban ti nyadi soldadu enggau polis ti be­rambunka nyawa ukai utai ti tau dikena kitai bemain tauka betundi laban sida tu udah nyabung pemerani enggau nyawa diri ba ujung senapang munsuh.
Enti sema jai mimpi salah hari dia deh nyawa sida empu tau bendar bebadi. Ni pan penyampau duit nadai meh ulih nganti nyawa enggau pemerinsa sida. . . Sejuta sigi tetap enda chukup dipelaba aku, tandu Neilson.
“Nya alai ngena endar raban bujang berani diberi tanda basa baka midul berani sereta lebuh sida ninggalka dunya tu diberi basa ti pemadu tinggi baka Datuk Kanang.
“Penulis blog patut berund­ing panjai, enti nyema kitai nadai raban orang ti berani baka Datuk Kanang enggau soldadu sereta polis ti bukai kada menua kitai likun tauka maju baka seharitu,” ku iya.
Kitai Iban patut ngeransi lebuh ninga penemu ti kelalu nadai basa baka ti dipansutkan dalam blog nya.
Enti orang ti mansutka pen­emu nya nemu adat tauka bisi basa, iya patut minta ampun ngagai kaban belayan Datuk Kanang, bala Iban Sarawak enggau perintah menua ti udah meri basa enggau pan­gkat ti pengabis tinggi ngagai niang Datuk Kanang, tandu Neilson seraya nyukung ra­ban orang ti bisi udah ngaga riput polis senetang pekara tu dikena nangkan bala blogger awakka bejimat agi sebedau mansutka penemu dudi ila.

Read more: http://www.theborneopost.com/2013/01/08/bansa-iban-ringatka-penerang-kanang-bukan-hero-sebenar/#ixzz2ImmI7RlC