Penyerakup kunchi pemujur bansa Iban – Alfred Jabu

Penyerakup kunchi pemujur bansa Iban – Alfred Jabu

Oleh : NewsDesk

Tarikh Disiarkan : 15-Oct-2013

SIBU : Raban bansa Iban ditesau negutka agi kaul ke dikembuan ngelama tu ngambika perintah muntang agi ngemujurka program pemansang ba menua bansa Iban kelebih agi ba kandang menua pesisir. Sapit Kepala Menteri, Datuk Patinggi Tan Sri (Dr) Alfred Jabu anak Numpang madah, penyerakup endang kunchi pemujur ngagai bansa Iban begulai enggau bansa bukai ngasaika pangka pemansang setipak enggau juluk nyadi menua maju ba taun 2020.

Sukung ari bansa Iban beguna amat dalam nyaup perintah ngemujurka program transformasi, ku iya rambau bejadi Aum Tuai Raban Bansa Iban Sarawak 2013 ti berambaika jaku ‘Mansang Pegari’ bepalan ba Kubu Sylvia, Kapit ditu kena Hari Enam tu tadi. Jabu ti mega nyadi Menteri Betanam Betupi Moden enggau Pemansang Menua Pesisir nesau raban bansa Iban anang mendingka penemu orang ke nguji mambarka bansa Iban enggau chara ngelaban perintah. “Anang mudah alah laban penemu orang ke begedika bansa kitai. Enti kitai terus beserakup, kitai tentu deka kering.

Diatu semina tinggal tujuh taun agi endur nyapai Tinjau 2020,” ku iya lalu madahka Sarawak deka nerima agih belanja ke besai ari perintah besai dikena ngelengkaska agi pemansang. Ngenang aum nya, Jabu bisi ngasuh tuai raban bansa beratika enggau manah isu-isu ke bisi dipejuraika dikena ngemansangka bansa Iban ba negeri tu. Berebak enggau nya, iya ngumbai auk keterubah iya diatur ba Kapit pengudah 51 taun endang nyadi pekara sejarah ungkup negeri tu. “Terubah iya aum tu diatur kena 15 Februari, 1962, bepalan ba (Kubu Sylvia Kapit) maya jeman Tun Jugah Barieng ke ngangauka semua tuai raban bansa ba kandang menua Kapit nyengkaum Sibu baum berandauka penemu enggau numbuhka serakup Malaysia.

“Maya nya bisi 51 iku tuai raban bansa ke bisi enggau. Semua sida udah nadai magang lalu iya ke agi mengkang iya nya Pengulu Kumbong Gerinang ke bisi enggau kitai malam tu," ku iya. “Chukup besai reti aum ke sekali tu dikena mulaika pengingat laban mayuh pemansang ke udah dibai ngagai negeri tu nyentuk ke sehari tu.

Sida nulung enggau numbuhka menua Malaysia nengah aum nya," ku iya. Sama bisi datai Menteri Pemansang Tanah, Tan Sri Datuk Amar James Masing, Menteri Pemansang Sosial, Tan Sri William Mawan Ikom, Menteri ba Opis Menteri Besai, Datuk Joseph Entulu Belaun, Sapit Menteri Pemansang Menua Pesisir enggau Wilayah, Datuk Alexander Nanta Linggi, Sapit Tuai Dipebasa Dewan Rayat, Datuk Doris Sophia Brodie, Penulung Menteri Rengka Rama, Datuk Stephen Rundi Utom enggau Penulung Menteri ba Opis Kepala Menteri, Datuk John Sikie Tayai.