Panggal Jaku

PANGGAL JAKU

Sebedau berengkah aku deka  manyunka iya enggau jaku tuai seleka dua

Kita udah ngasuh aku BERAKITKA TALI SABIT  ba mua kitai ke semuka DUDUK BEKEMPIT. Nya manah laban sapa kitai ke bisi nasit nya meh ke bejarit nganjung timpuh

Kita udah ngasuh aku NGUSAIKA TALI PANJAI ba mua kitai ke besemuka DUDUK BERIMBAI. Nya pen manah mega laban enti udah tekusai lagi nya baru berasai didinga bala mayuh

Kita udah ngasuh aku BERAKITKA PIET DABUNG SENUYUNG ba mua kitai  ke kemumuk duduk bebandung. Nya ke bagas BEPALAKA ULAR SAWA BELUMPUNGKA ULAR TEDUNG ke lama udah memunyi rengung-rengung landik nyengkilung nempalung jauh.

Taja pan pia aku tak ngenung lama ngenduk tadi laban MEDA LUBUK di Kapit lelenuk tak beteluk mua penalam-nalam

·        Bisi orang ngumbai nya BAKAT lalu bisi mega ngumbainya LELANGAN

·        Bisi ngumbai nya RIBUT bisi ngumbai nya UJAN

·        Tang peda aku nya ga tak PUGU INDU SELATAN lama udah derampderam nabankan rauh

Ny alai enti nyemaka aku teindikka luchak mechik lagi anang kitai GUAI BEPUTIK NGIGA ADAT

Enti aku telanchar ba batu gar anang kita tak ENTUAR LALU RINGAT

Enti aku tepantup ba batu tekup bedaup arapka kitai enda BETEGUT MANSUTKA PUTAP. 

SIMPUL JAKU

Indah enda...

·        Baka kitai ti nebas riris udah sangkai di tatai tinting renjan

·        Baka kitai ti merau udah datai di pengkalan

·        Baka ti belumba udah manggai di adan

Sebedau aku nyurutka diri akau deka nyimpul  keretas jurai tu enggau genteran jaku dalam.  

Ngiga orang ti BEMATA MANAH PERENING ngambika ulih ngiring kitai ngagai tinting alai selangking beseling dulu tumbuh.

Ngiga orang ti BEKAKI PANJAI DERAS PEJALAI ngambika ulih nantaika kitai ngagai tatai alai rigai ke gelegai dulu tumbuh

Ngiga orang ka TAN ISI, nguluka kitai mandi di ai ke bebali muai pengeruh

Ngiga orang ke GANGGAM LENGAN LANDIK BEBAN, ngaga langkan, ngambika meruan deras dikayuh

 Ngiga orang ke NGEMBUAN PEPUTAN dikena ngaduka chuan dulang penyepuh.

Nya baru pengawa kitai deka MAJU  lalu IPUH deka munuh

Nya baru enda lebu kitai bisi pengiruh MAYUH TUBUH.

Terima kasih