Bajet 2013 ungkup semua rayat, ukai EB: Dr Neilson – BorneoPost Online

Anang madah bajet pengawa bepilih laban nya munyi ke bisi tuju bukai kelimpah ari ti bebendar nulung rayat
KUCHING: Bajet 2013 ti bantaika Menteri Besai (PM) Datuk Seri Najib Tun Razak ensana, sebengkah atur belanja ke manah laban iya nyerangkung semua rayat, ku Sapit Dekan Fakulti Sains Sosial Universiti Malaysia Sarawak (UNIMAS) Prof. Madya Dr. Neilson Ilan Mersat.
Iya ke nyadi seiku pengemata politik enda setuju enggau penerang ti madah Bajet 2013 ti ngemeratka pengelantang rayat nya bajet pengawa bepilih tauka election bajet (EB).
Ku iya, jaku bajet pengawa bepilih enda tentu manah didinga laban iya munyi ke bisi niat tauka tuju bukai kelimpah ari ti bebendar nulung rayat
“Enti iya EB reti nya ukai bajet tang nyau baka umpan, nya alai enda tau dikumbai EB enggaika nadai sereta diperambu ukai enggau ati ti lurus,” ku iya.
Bajet 2013 ngungkupka RM251.6 billiun dikena bejalaika program sereta projek pemansang.
“Agih ti mayuh ngagai pelajar sekula dikearapka ulih nyungkak pemansang pelajar kelebih agi ba menua pesisir.
“Arapka bajet tu terus dipejalaika enda ngira sapa ti bekuasa sepengudah pengawa bepilih besai tu ila,” ku iya madah ngagai Utusan Borneo nengah pesan jaku pandak (SMS) kemari.
Bajet ti manah ungkup semua rayat tau dipuji enda ngira sapa ti bekuasa megai perintah, tandu iya.
Dalam bajet nya, RM100 diberi ngagai 5.4 juta iku pelajar sekula, penyampau baucher bup ditikika ngagai RM250 ungkup 1.3 juta iku nembiak universiti enggau nembiak Pom Enam.
Beri Bantu Rayat 1 Malaysia (BR1M 2.0) dilanjarka ngagai taun 2013 ungkup semua ruang bilik ti penatai pemisi kurang RM3,000 alai orang bujang ke ngembuan penatai pemisi kurang RM2,000 mega diserangkum dalam program tu.

Penatai Iban, pemindah bansa Iban – BorneoPost Online

by Chris Bishop. Posted on September 25, 2012, Tuesday

SEBENGKAH PEJALAI: Kar mandangka pun penama Iban ngagai Sarawak nengah Sungai Kapuas semak Lubok Antu.

PENIKI: Lakar Beji ngaga tangga ari puchuk pun entepung ketegal ti deka ngiga petara ke langit.

Pejalai bansa Iban tama ke S’wak sebedau jeman Rajah Brooke: Tusun 1
TULIS kitai serak tu ngenang senentang sebengkah program Polemik Sejarah Malaysia Sesi ke 27 ti diatur Arkib Negara Malaysia kenaka 19 September 2012 tu tadi.
Dalam program nya Sapit Dekan Fakulti Sains Sosial Universiti Malaysia Sarawak (UNIMAS) Prof. Madya Dr Neilson Ilan Mersat diberi awak mantaika asil pansik iya dalam topik ‘Sejarah Awal Migrasi Kaum Iban di Sarawak’ tauka pejalai bansa Iban ke mindah ari Kapuas, Indonesia ngagai Sarawak sebedau jeman Rajah Brooke (taun 1400 – 1840).
Dr Neilson seiku pemansik enggau orang akedemik ti seruran bejalaika pansik senentang parti politik, pengawa bepilih, Iban Diaspora di Borneo sereta pengidup raban bansa Sarawak (Iban) kelia enggau diatu.
Iya kala ngaga bup ‘Demokrasi di Pinggiran’ enggau ‘Biografi Dato Sri Edmund Langgu anak Saga’. Iya mega dipilih dalam komiti ti megai tanggung pengawa mansik Kurikulum Sejarah sereta Bup Teks Sejarah Sekula Sekondari Malaysia (2011-2012).
Bela datai ba program sehari nya Direktor Arkib Negara Malaysia Daresah Ismail, seiku pemansik sejarah Iban Dato Sri Edmund Langgu anak Saga lalu entara speaker ke bukai iya nya Prof Madya Dr Bilcher Bala, Universiti Malaysia Sabah (UMS) bejuraika topik ‘Fakta Sejarah Sarawak Pada Era 1400 – 1840, Bidah Ugong (UMS) ‘Migrasi Dan Petempatan Masyarakat Bidayuh Dari tahun 1400 – 1840’.
Dalam Keretas kereja Dr Neilson, iya bejuraika tiga bengkah teori pejalai bansa Iban ti mindah ke Sarawak ti ditulis Benedict Sandin dalam taun 1967.
Teori keterubah madahka Iban tama ke Sarawak nengah Tanjung Datu di Lundu.
Teori ke 2 madahka Iban tama ke Sarawak nengah Bukit Merudu ti enda jauh ari Brunei.
Teori ke 3 madahka bansa tu datai ari Lembang Kapuas tama ke Sarawak nengah menua Kumpang. Teori tu suah agi dikena raban pemansik alai mayuh penerang ti udah digempuru madahka tebal agi bansa Iban ti mindah ke Sarawak datai ari Lembang Kapuas nengah Kumpang.
Keretas kereja Dr Neilson meratika pejalai bansa Iban nitihka teori ke 3 alai penerang diambi ari tulis raban pemansik ke dulu nyengkaum orang nulis ari menua luar.
Pejalai bansa Iban
Ku Dr Neilson, pejalai bansa Iban mar dipereti ketegal ti nadai rikut maya Iban berengkah mindah ke Sarawak. Nadai rikut sejarah ti nusui maya ke endar Iban berengkah bejalai.
Nitihka penerang Sutvile (1988), pejalai Iban nya sebengkah pengawa ti enda putus alai bansa tu mindah dalam raban ti mit lalu enda mungkur beratus tauka beribu iku orang.
Entara kebuah Iban mindah iya nya ngiga tanah endur bumai bekebun, ngiga kandang endur ngasu jelu sereta begiga tanah endur berumah.
Nitihka penemu runding Empiang Jabu, pejalai bansa Iban dibagi ngagai tiga renggat. Renggat keterubah iya nya pejalai Iban ke mindah ngagai Bagi Kedua Sarawak urung taun 1540 nyentuk ke 1840.
Renggat kedua nyadi ba Abad ke 18, alai pejalai Iban ngerembai ngagai Lembang Rajang, Katibas sereta Julau.
Renggat ketiga nyadi ba Abad ke 20 iya nya ngerembai ngagai Limbang, Suai enggau Niah (1927), ke Balleh (1920) sereta Lundu (1955).
Renggat keterubah pejalai bansa Iban
Renggat keterubah pejalai Iban suah dikaitka enggau cherita Beji di menua Ketapang, Indonesia. Nitihka cherita ti suah didinga sereta ngaitka pejalai Iban, Beji nguji deka niki ke langit nengah tangga ke digaga ba atas pun entepung ketegal ti deka betemu enggau petara sepengudah ninga ari orang dagang Arab (Islam) petara diau di langit.
Taja pia, Beji enda mujur betemu enggau petara ketegal pun entepung nya tumbang sepengudah diempa indu sampuk.
Sepengudah diau di Ketapang pengelama beratus taun, peturun Beji lalu mindah ke Kayung.
Di kayung, peturun tu betemu enggau orang dagang menua Arab ti ransing ngerembaika ajar ugama Islam ti ngujungka peturun Beji belah dua.
Raban ti setuju nerima ajar Islam mengkang diau di Kayung lalu raban bukai ke enda setuju mindah ari Kayung lalu ngejang ke Ulu Kapuas.
Nitihka Sandin (1994), peturun Beji udah mindah ngagai mayuh palan berengkah ari Ketapang nuju ke Kayung lalu nuju ke Ulu Landak. Ari nya raban tu mindah ngagai Malawi alai sida iya ngentapka pendiau diri pengelama 3 peturun. Udah nya peturun Beji tu mindah ngagai Sintang lalu ke Sungai Kapuas.
Peturun mindah ari Sungai Kapuas nuju ke Sungai Skayam ke diuan bansa Mualang. Ari Sungai Skayam raban tu mindah ngagai Sungai Sanggau.
Di Sanggau bisi genturung pendiau Iban ti chukup besai alai udah nya sekeda peturun tu lalu mindah ngagai sekeda kandang endur di Batang Kapuas. Udah nya pejalai tu dilanjarka ngagai Semitau lalu terus nuju Ketungau alai peturun tu udah ngentapka pendiau diri di kandang endur ti dikumbai Bila Dua Tapang Praja.
Pejalai bansa Iban tama ke Sarawak berengkah ari Bila Dua Tapang Praja di Sungai Ketungau alai tebal agi penau senentang pejalai Iban mindah ke Sarawak berengkah ari kandang endur ngelingi Sungai ketungau.
Cherita Beji enggau siti agi cherita, Tembawai Tampun Juah suah dikaitka enggau cherita penatai bansa Iban (enda dirikut) tama ke Sarawak. Enti bansa Iban ditanya ari ni penatai aki Ini, Iban tebal agi deka ngaitka diri enggau Beji tauka Tampun Juah. Kededua cherita tu dikena nerangka pejalai bansa Iban kelia menya.
Bila Dua Tapang Praja
Pejalai bansa Iban ti mindah ari Ketapang ngagai Bila Dua Tapang Praja nempuh timpuh beratus taun.
Di Bila Dua Tapang Praja, peturun Beji berengkah begulai enggau raban petara ke beguna dalam pengarap Iban iya nya Sengalang Burung, Sempulang Gana, Seregindi, Seregindah sereta ke bukai.
Ambika Chunto, dia meh endur Serapoh teulihka ajar ari Puntang Raga senentang chara ke betul ngintu pemati.
Udah nya anak lelaki Serapoh ke benama Menggin jadi enggau anak Sengalang Burung, Dara Tinchin Temaga (Sandin 1962). Anak Menggin ke benama Sera Gunting nerima ajar ari Sengalang Burung lalu ajar nya dipeturun ngagai bansa Iban nyentuk ke diatu.
Ari Bila Dua Tapang Praja, bansa Iban berengkah tama ke Sarawak nuju menua Undop, Batang Ai, Skrang, Lemanak, Bukit Balau, Merdang di Samarahan, Saribas, Selepong, Melugu, Gua, Nyelam, Klauh, Engkeramut. Maya pejalai keterubah tama ke Sarawak semua tu bedau ditemu tang dipelaba urung taun 1540.
Di Bila Dua Tapang Praja mega bansa Iban berengkah nemu bekayau alai Serapoh nerima ajar ari seiku petara ti madah siti chara kitai nembuka pengawa ngulit iya nya bekenaka pala mensia …berengkah ari nya (beratus taun dulu) pengawa kayau lalu dikemeran nyentukka jeman Rajah Brooke.

SEKEDA ACHIR BANSA IBAN: Genturung pendiau Iban di Kalimantan Barat jeman nya.

PEMUN PEJALAI: Prof. Madya Dr Neilson Ilan Mersat mantaika keretas kereja ‘Sejarah Awal Migrasi Kaum Iban di Sarawak’ tauka pejalai bansa Iban ke mindah ari Kapuas, Indonesia tama ngagai Sarawak sebedau jeman Rajah Brooke (taun 1400 – 1840).

<< Previous Entry
To enable your comment to be published, please refrain from vulgar language, insidious, seditious or slanderous remarks. This includes vulgar user names.