PENGAWA NASIH TANAH ENDUR NGAGA DUA ITU OPIS TU BESAI ENDAR RETI KELEBIH AGI NGAGAI BANSA KITA IBAN. KEBUAH PIA LABAN TU MEH ALAI KITAI NYIMPAN, BEJURAI LALU NGEREMBAIKA ADAT ENGGAU MAIN ASAL BANSA KITAI IBAN DI SARAWAK. DITU MEH ALAI MAJLIS ADAT ISTIDATA TI NYADI PAYUNG NGEMATA LALU NYAGA ADAT KITAI IBAN. DITU MEGA ALAI COURT NETAPKA PEJALAI ADAT KITAI IBAN TI DIKENA BESARI-SARI DALAM PENGIDUP KITAI. KITAI ARAPKA OPIS BARU TU MUJUR DIGAGA SERETA TAU ENDAR NYADIKA LAMBANG TI NGASUH ATI BALA KITAI IBAN DI SARAWAK BERASAI TEMEGAH.

Borneo Post - Opis MAIS enggau Kot Bumiputera ke beungkus RM40 miliun disadang tembu 2014, ku Jabu

Posted on September 4, 2012, Tuesday

BAKATU PELIN YA: Jabu (kiba) enggau Manyin (tengah) meratika pelin kededua opis MAIS enggau Kot Bumiputera Sarawak ba pengerami nasih tanah, kemari.

SAMARAHAN: Opis baru Kunsil Adat Istiadat Sarawak (MAIS) enggau Kot Bumiputera Sarawak ke berega RM40 miliun disadang tembu digaga ba taun 2014.

Sapit Kepala Menteri Datuk Patinggi Tan Sri Dr Alfred Jabu madah pengawa ngaga kededua opis nya deka berengkah diatu lalu disadang tembu dalam timpuh 24 bulan.

“Perintah nengeri udah meri 14 ikar tanah dikena ngaga kededua opis Kunsil Adat Istiadat Sarawak enggau Kot Bumiputera Sarawak.

“Tu meh palan ti pemadu manah endur ngaga opis nya dikena meri basa ngagai raban bansa Dayak. Kededua opis nya digaga ba bandar Ilmu besendi enggau dua buah universiti iya nya UiTM enggau UNIMAS,” ku iya.

Menteri Besai Datuk Seri Najib udah ngungkupka RM40 miliun dikena nembuka opis nya lalu tu kelai iya ti seruran ngemeratka raban bansa kitai Dayak, tandu iya.

Jabu mansutka penerang tu ba siti aum pengarang berita pengudah bejadika pengawa Nasih Tanah Palan Opis Kunsil Adat Istiadat Sarawak enggau Kot Bumiputera Sarawak di Samarahan kemari.

Ku iya, tembu ila palan tu deka nyimpan bemacham rikut sereta sejarah raban bansa Dayak nyengkaum Iban, Bidayuh enggau Orang Ulu.

“Palan tu mega tau dikena ngerembaika main asal bansa Dayak kelimpah ke dikena nyadi palan ngintu pemaik pesaka lama genap raban bansa.

“Aku minta sejarah pemujur olimpian Malaysia Pandelela Rinong disimpan ditu sereta pia mega jerita Bryan Lomas enggau Tracy ti bela ngangkat nama Sarawak dalam lumba Olimpik.

Ba pengawa nasih tanah nya kemari, baka ke suah nitihka adat Dayak sebedau ngentakka rumah tauka opis, pengawa miring minta berkat ari petara diadu lalu diuluka raban temenggung.

Entara raban temenggung ke bisi enggau pengawa miring, Temenggung Datuk Kanang anak Langkau sereta Temenggung Datuk Kenneth Kanyan.

Bela datai ngulu pengawa nya, Menteri Pemansang Infrastruktur enggau Penyambung Dato Sri Michael Manyin, Menteri Muda Betanam Betupi Datuk Mong Dagang, Menteri Muda Tanggung Pengawa Raban Bansa Datuk Peter Nansian, Presiden Kunsil Adat Istiadat Datuk Nillie Tanggai sereta raban ketuai pupu bansa ke bukai.