Sebengkah ari program ti chukup manah dikereja bala nembiak sebedau sida nembuka Master Programme sida iya nya ngaduka Field Work alai sida nguji ngaga pansik bengepankan tauka bemalinka pemandai ti udah ulih dipelajar dalam kelas. Nembiak ari UNIMAS begulai enggau nembiak ari University Copenhagen, Denmark ngaduka field work sida di Selepong, Sri Aman ba bulan tiga 2012 tu tadi dalam pengelama sebelas ari. Rumah panjai ti alai sida diau iya nya di Rumah Stpehen Karin, Selelpong Berangan. Sambut enggau basa bala ba rumah panjai nya ngagai bala nembiak ti datai chukup mana endang nitihka basa enggau adat kitai Iban ti dikemeran kitai ngelama tu.

Gambar kenyalang tu diambi ba rumah niang TR Minit anak radin di Engkeramut, Sri Aman.

Bala indu rumah panjai Selepong Berangan nyendiaka diri ngambat bala temuai.

UNIMAS enggau Universiti Of Copenhagen mujur ngadu fieldwork di Selepong Brangan

by Chris Bishop. Posted on April 29, 2012, Sunday

KUCHING: Rumah panjai Selepong Brangan urung 50km penyauh ari pasar Sri Aman udah dipilih nyadi palan nembiak pelajar ari dua bengkah unversiti bejalaika pansik sepengelama 10 hari berengkah 3 March 2012 tu tadi.
Universiti Malaysia Sarawak (UNIMAS) sereta Universiti Of Copenhagen, Denmark bela nganjung seraban 15 iku nembiak pelajar ke benung nembu tauka ngaduka fieldwork sida dalam degree ti dikumbai Master Degree in Sustainable Landuse Development.
Penatai raban nembiak pelajar ke nyerangkum ari menua Germany, England, Denmark, Mexico enggau ari menua Malaysia tu empu udah disambut Tuai Rumah Stephen anak Karin nitihka adat basa kitai Iban ti endang selalu dikenaka ngelaluka bala temuai.
Raban pelajar tu bejalaika pansik senentang pengidup, pun penatai pemisi, ai, tanah, utai tumbuh sereta pia mega mansik jelu ti bisi ba menua tu.
Dr. Wong Swee Kiong ari Fakulti Sains Sosial madah tiap taun UNIMAS ngatur program ‘Sustainable Land Use and Natural Resource Management’ (SLUSE) lalu pelilih Sri Aman udah dipilih taun tu.
“Program SLUSE meri pemaik ngagai kededua raban pemansik sereta rayat ke diau ba rumah panjai.
“Rayat rumah panjai deka teulihka peneleba ngasai chara nembiak unversiti belajar ke nyengkaum raban nembiak ari menua luar sereta meretika atur pansik ti dipejalaika sida iya sepengelama 11 hari.
“Nembiak rumah panjai mega deka teulihka peransang belajar bebendar ngambika tau nitihka singkang nampung pelajar ba universiti,”ku Dr. Wong.
Ari pemutus pansik, rayat rumah panjai mega tau nemu pemanah tikas ai ke diirup ngelamatu, pemanah tanah endur bumai betanam sereta pekara bukai ke enda kala dipejurai, tandu iya.
Iya mega madah ba pengujung pansik, raban pelajar tu deka mantaika riput senentang pemutus pansik ke udah diadu lalu deka diberi ngagai Tuai Rumah enggau opis pelilih menua/residen.
11 hari diau ba rumah panjai, raban pelajar tu udah ngasai peneleba senentang chara orang rumah panjai bejalaika pengidup ninting hari begigaka pemakai ba tanah, sungai sereta ari utai ke tumbuh enggau jelu babas.
“Raban pelajar teulihka awak begulai enggau orang rumah panjai lalu ngasaika peneleba ba jalai pengidup sida iya ninting hari.
“Program tu mega nyapai juluk ke udah ditetapka lalu meri peneleba ngagai raban pelajar ngasaika pekara ke amat nyadi ba rumah panjai sereta ngemuntangka atur pansik dalam program SLUSE,”ku iya.
Penatai raban nembiak tu ba Selepong Brangan disambut enggau gendang sereta ajat Iban. Sida mega disibur enggau ai irup kitai Iban iya nya Ai Tuak. Raban ari rumah panjai ke semak baka ke Selepong Kunang, Selepong Jagu enggau Selepong Lop bisi mega datai ngerami sereta ngelaluka raban nembiak nya.
Kelimpah ari tuai rumah Stephen anak Karin bala tuai rumah ke bukai iya nya TR Bandi ari Selepong Kunang enggau TR Aling ari Selepong Lop mega sama bisi mansutka penemu lebuh ti ngelaluka bala nembiak.