Pegari : “Ari Nanga Apan Terengkah di Canberra “: Pengingat Belajarka PhD

“Ari Nanga Apan Terengkah di Canberra “: Pengingat Belajarka PhD

Kenang tu dikena aku mulaika pengingat diri lebuh ti nguji enggau orang niki “tuchung rabung menua” lalu sereta nembuka semua renggat pengawa dalam pelajar sekula. Kenang tu ukai baka ular mandangka sima tauka baka landak mandangka baga tang iya dilekatka dalam surat sereta dipansutka dalam bup laban dikena aku bekunsika utai ti udah diasaika batang tubuh diri empu. Arapka iya tau meri penguntung ngagai bala pemacha kelebih agi bala ti bisi ati deka nguji nunjan niki mansang ngagai tuchung rabung menua dalam cherita aku tu lagi. Karang tu ditusi enggau jalai cherita awakka nyamai diperatika bala pemacha mayuh. Nya alai pengingat dalam kandang empat taun (2000-2004) nya ti manah sereta meruan dalam karang tu tau nyadi peransang lalu iya ti kurang tau diengkah ke tisi. Alai pengawa sekula aku belabuh di SRK Nanga Apan di Kabo (Saratok) lalu tembu di The Australian National University, Australia. SRK Nanga Apan iya nya siti ari sekula primari ti bisi di batang Kabo. Sekula Nanga Apan meh alai pejalai pengawa sekula aku belabuh kenyau ari taun 1971 menya. Kena ngingatka sekula ti alai aku belabuh belajarka “ABC” menya nya alai karang tu ditelah aku nama baka ti di atas iya nya : “Ari Nanga Apan Terengkah di Canberra”: Pengingat Belajarka PhD

Berita bulih scholarship

 Lemai nya aku enggau pangan aku siku ari Kerala (India) ti benama KC Kumar, lama amai berandau dalam bilik hotel ke alai kami diau. Ari maya nya naka iya penyelap lalu nitihka padah radio (dalam jaku Jerman)  penyelap maya nya kurang ari 10 degree.  Berasai chelap nyentuk ngagai tungkul idung. Randau kami duai mayuh macham tang tebal agi kami duai mulaika pengingat lebuh ti sama belajar di Southern Illinois, Carbondale (US).  Ari pemayuh kami sebuat ti enggau orang berami ngambat President Bill Clinton ti nemuai ngagai St Louis ba pun bulan tujuh taun 1999 menya KC Kumar tu tau dikumbai “special” laban iya aja diberi bala Secret Service peluang ngampir semak lalu ulih betabi enggau Bill Clinton. Bala kami bukai meratika ari tisi aja.  Diatu kami duai betemu baru ba tengah-tengah menua Europe, Salzburg (Austria). Menua ti tebilang ngadaka siku orang ti landik pasal muzik iya nya Wolfgang Amadeus Mozart. Udah ngetu berandau kami duai sama nuju bilik computer ba tingkat baruh hotel lalu ngabas email nyangka bisi berita ari bala pangan. Lebuh ti muka siti ari email ari pangan ti sama opis enggau gawa dia alai aku berasai tekenyit sambil gaga lebuh iya madahka aku bulih scholarship lalu dikemendarka belajar baru ngambi Doctor of Philosophy (PhD) di Australia. Aku lalu tekalanya malas email iya lalu mega ngenataika berita manah nya ngagai bala kami sebilik di Kuching. Aku mega madah ngagai pangan aku KC Kumar senentang berita tu lalu iya mega berasai gaga ati. Empat ari udah nya kami duai beserara baru laban kursus udah tembu lalu sama pulai ngagai menua diri.   

 

Sepemanjai rantu jalai nepan bilun angkat ari Geneva International Airport ngagai Kuala Lumpur dia alai mayuh amai utai dalam runding aku. Taja pan pejalai ngena bilun nyau deka bulih dua belas jam tang aku nadai ngenyapka mata. Asai ati bechampur-champur, bisi nya gaga lalu bisi nya tusah lalu pia mega bisi nya berasai takut. Ati berasai gaga laban agi bisi peluang belajar baru ngagai iya ti tinggi agi. Laban enti ngarapka puku diri empu tentu enda ulih ngasurka diri ngenyauh nya. Ambika banding, bayar dikena belajar aja tauka “tuition fees” udah mua penyampau, iya nya, tujuh belas ribu dollar setaun. Bisi mega ati tusah laban ngenang diri ti deka mansang jauh belelang ngagai menua orang dalam kandang ukai sari dua tang betaun-taun. Retinya jauh ninggalka menua diri. Kadang-kadang ati balat agi kesal sereta takut laban nemu pelajar ba tingkat ti sekali tu enda baka ngaga degree ti keterubah tauka Master. Mayuh endar cherita udah didinga senentang orang ti tebunsa laban utai ti dipelajar endang pedis. Bisi nya enda pass lalu mayuh mega ti ngechul lalu enda ulih tembu.

Nyendiaka diri mupuk

Lebuh ti nurun kereja ngagai opis dia aku meda surat madahka bulih scholarship endang bisi dalam peti surat aku. Enggau surat tu mega aku enda tau enda nyendiaka diri mupuk belajar baru.    

Nyadi lebuh ti nyendiaka diri mupuk mayuh amat utai ti enda tau enda dikereja kitai baka peresa pengerai batang tubuh. Ngaga passport lalu minta visa dikena belajar di Australia. Kelimpah ari nya aku mega selalu mukul talipaun ngagai sida ari opis ti ngemataka nembiak di The Australian National University (ANU). Lalu endang baka kitai nembiak ari luar negara (international student) dia alai mayuh endar utai deka ditanya tauka dipansik orang ti bekuasa di universiti alai belajar, opis immigration lalu pia mega opis High Commissioner Australia di Kuala Lumpur. Kadang-kadang kundang kuit nurun ke Kuala Lumpur laban pengawa enda ulih dikereja ngena surat tauka betalipaun tang mayuh agi begunaka batang tubuh kitai empu. Ambika banding enti kitai deka ngerumban visa manah agi enti kitai ulih datai batang tubuh ngagai opis High Commissioner Australia di Kuala Lumpur. 

Maya ti patut bekejang nyau semak nya alai sebedau nurun dia alai aku minta berkat petara awak ka ngemata sereta nyukung mandung aku enggau bala kami sebilik. Di rumah panjai pengawa minta berekat dikereja enggau piring enggau ading. Endang sigi baka orang Kristian kitai mega minta berkat ngagai petara kitai enggau jalai sembiang. 

 

Mupuk – serara enggau bini anak

Kena 29 November 2000 aku bekejang ninggal ka Kuching lalu mansang ngagai Canberra iya nya indu nengeri menua Australia laban nya meh endur ti dipilih alai betapa dalam kandang empat taun ti deka datai. Ketegal ari pengawa enggau penanggul bukai ti enda ulih diseliah dia alai aku nurun kediri lalu ninggalka bini anak. Serara enggau bini anak endang sebengkah ari utai ti chukup pedis lalu dipelabaka aku kitai mensia enti sema ulih endang deka nguji ngelipakka  pendiau ti serekang enggau diri sebilik. Tambah mega pengelama ke deka beserara nya ukai sari dua tang betaun-taun. Indah enda baka serebana dalam leka lagu kepai jari bini anak ba padang bilun Kuching sari nya disereta enggau ai mata. Ari Kuching aku mansang ngagai Kuala Lumpur  lalu udah nya baru  terebai kira-kira lapan jam baru terengkah di Kingsford Smith Airport di Sydney. Aku ngetu di padang bilun Kingsfort Smith di Sydney dulu lalu udahnya betukar nepan bilun mit dikena ngenataika diri ngagai Canberra. Penatai di padang bilun di Canberra di sambut pengari ari universiti ti alai belajar. Sida mai ngagai alai ti endur diau iya nya di Garran Hall. Ari chukup manah lalu tambah mega  musim panas baru deka belabuh. 

Nerenah belajar di menua orang

Dua tiga ari sekumbang udah datai ba menua baru ti alai belajar dia ati endang agi merampau sereta seilu-ilu. Lama udah enda diau ngidupka diri jauh ari bini anak dia alai berasai endar enda nyamai. Kelimpah ari nya asai diau ba menua orang endang bisi nyelai ari menua diri empu. Tambah mega maya nya universiti benung pemisi musin panas lalu berasai puang sereta sunyi. Taja pia menua ti sunyi nya manah amat alai belabuh nerenah belajar.

Udah badu merarau aku bejalai ngagai endur ti alai belajar iaya nya Research School of Pacific and Asian Studies (RSPAS) lalu betemu enggau supervisor ti endang udah nganti penatai aku laban iya sigi udah nemu aku datai sari nya. Pengajar tauka Supervisor ti dipaduka ngajar sereta nyadika malin aku dalam kandang empat taun nya iya nya Harold Crouch. Iya tu siku ari Political Scientist ti tebilang lalu mayuh udah ngaga pansik sereta nulis pasal politik menua Malaysia enggau Indonesia. Aku berasai gaga sereta betuah laban ulih beguru tauka betarak ba siku political scientist ti tebilang ba dunya tu baka Harold Crouch. Kami duai udah lama bekelala laban iya udah nyadi supervisor aku lebuh ti ngambi degree ti keterubah. Lebuh ti betemu lemai nya randau kami duai mayuh agi berandau lelengau. Udanh nya randau ditampung enggau ngatur program senentang tusun pengawa ti deka dikereja dalam kandang empat taun ti deka datai. Tu mega endang utai patut dikereja tiap iku nembiak ti belajar ngambi PhD. Kitai mesti bejurai enggau pengajar kitai nama utai ti deka digaga kitai belabuh ari pun tauka ari ti keterubah lalu nyentukka ngagai PhD kitai tembu. Kebuah pia awakka pengawa kitai bisi atur lalu utai ti dikereja ulih tembu dalam timpuh ti ditaga. Kitai mega ngereja pengawa nitihka program ti udah di atur nya tadi. Taja pan pejalai kitai endang tentu bisi limpang ari perambu asal kitai tang perambu nya tau nyadika pelasar kitai ngatur pengawa.   

Lebuh ti belajar aku diberi orang siti bilik di Coombs Building ti endang sedia enggau kereban dikena belajar baka computer enggau internet, talipaun, injin ngasuh angat (heater) lebuh mayuh musin chelap sereta enggau kereban bukai. Semua nembiak bukai ti sama ngambi PhD mega diberi kereban ti sama sebaka. Tu meh pemanah orang enggau kitai lebuh kitai belajar tinggi. Sekula ti alai kitai belajar nyendiaka perengka ti diguna kitai awak ka kitai ulih ngereja pengawa enggau manah sereta nadai penekul. Berimbai bilik enggau aku dia iya nya nembiak ari menua bukai baka ari Europe, Vietnam, Indonesia, Korea, Jepun enggau mayuh menua bukai. Bekunsi bilik enggau aku iya nya Nathan Quimpo. Iya tu bansa Filipino tang nyukung pengawa komunis ti dikumbai New Peoples’ Army (NPA) di Philippines lalu iya ngerarika diri ngagai Holland lalu nyadi rayat menua nya.  Taja pan penatai enggau jalai pengidup kami sebuat jauh nyelai ari pangan tang semua kami datai enggau tuju siti iya nya deka ngulihka degree ti dikumbai Doctor of Philosophy awakka nama ulih disembark enggau gelar pangkat “Dr” lebuh udah tembu belajar. Taja iya nyamai disebut dilah tang pejalai sekumbang ngulihka pangkat nya penuh enggau pemedis. Bisi maya lantang lalu pia mega bisi maya tusah kelebih lebuh runding nyau udah kusut. Nya alai bisi sekeda bala kami sebuat ngechul lalu nyurutka diri ba rantu jalai. Bisi nya laun tembu lalu sampai bebelas taun ngaga PhD sida. Siku pangan aku ari Australia empu udah “bibat” enggau thesis iya dalam pengelama 12 taun lalu apin tembu. Lebuh ti ditanya nama kebuah tudah tuai ngelama nya nulis thesis dia iya madah ngagai kami bukai ukai ketegal iya ending landik nulis dalam English (laban nya endang jaku dikena sida) tang laban runding iya dikena ngaduka penemu ti bebatang nya kelalu suntuk. Bisi mega sekeda ti pandak umur enda tetembuka pelajar diri alai parai. Ambika banding siku ari bala kami sebuat datai ari menua France tak enda tepadahka diri mupuk. Iya luput ba mija makai lalu nyau. Tu meh maya pengering semengat enggau penetap ati chukup beguna lalu barang sapa ti enda tan nya meh ti bisi nyurutka diri. 

Bakani jalai nembiak ti ngambi PhD belajar? Tu endang siti ari tanya ti selalu ditujuka bala kaban lebuh ti betemu. Kebuah pia laban sida deka nemu nama utai ti dipelajarka kitai lalu bakani jalai kitai belajar. Bisi sekeda orang ngaga PhD ngena jalai ngambi kursus tauka course work. Sida tu endang meruan bisi belajar dalam kelas lalu bisi pengajar ti meruan ngajar. Udah abis kursus nya baru ditampung enggau pansik mit ti dikumbai dissertation. Bisi mega orang ti belajarka PhD ngena jalai pansik tauka research aja. Lalu pemujur enggau pemuntan iya bepanggai ba asil pansik iya nya. Aku ngena jalai ti ngaga research aja lalu sukung enggau bandung supervisor besai endar reti kelebih agi lebuh kitai deka ngepunka penemu tauka lebuh tesat sereta jalang runding. Lebuh runding kitai udah puntan dia alai kitai begunaka orang ti pandai mai runding kitai pulai ngagai jalai ti betul baru. Tu meh pemesai guna pengajar nyadika malin kitai.

Taun ti keterubah kitai semina diasuh macha bup dikena nyendiaka “research proposal” tauka batang penemu enggau runding ti deka dikena nyadika pelasar pansik kitai. Nyadi penyampau bup dibacha endang sigi mayuh laban orang ti begelar PhD enda tau enda nemu semua karang enggau pansik orang bukai ti dulu agi ti bisi besangkut paut enggau pansik ti deka digaga kitai. Udah tembu ngaga proposal dalam pengelama kurang lebih setaun enggau setaun setengah (nitihka peneras siku-siku) nya baru kitai diterima masuk nyadi “PhD candidate” ti bendar lalu dikemendarka bejalaika pansik. Sekumbang ti begelar “PhD Candidate” kitai empai ulih ngena gelar “Dr” laban pelajar  kitai bedau tembu. Bisi sekeda ti manchal agi udah ngumbai diri “Dr” lebuh ti berandau tauka betundi enggau kaban sida.

Kelimpah ari ti macha bala ti gaga PhD mega diperansang datai lalu ningaka seminar ti endang selalu diatur tiap minggu. Ngenataika diri ba seminar ti baka tu besai endar reti laban iya tau endar ngasuh kitai nambahka penemu sereta betuaika bulu sereta bulih runding ari ti ningaka penemu ti dipansutka orang bukai. Tambah mega pengawa baka meri seminar, datai ngulu seminar sereta ngaga pansik endang batang pengawa ti dikemeranka “intellectual community”. Nya meh kebuah semua nembiak ti gaga PhD  endang diperansang datai enggau seminar. Kelimpah ari nya tiap iku nembiak mega diperansang  belajarka pengelandik bukai ti bisi diajar di universiti enggau nadai bebayar. Tu mega manah dikena ngansah penemu enggau pengelandik kitai ba pengawa bukai. Kursus bukai baka jalai ngena computer, belajarka jaku bansa bukai, belajar pasal ngintu pengerai tubuh enggau mayuh macham kursus bukai. Aku agi ingatka siti ari kursus ti bisi digulu aku iya jalai siku-siku kitai ngetanka ati ti selalu deka kebawan tauka ringat (Anger Management). Seminar baku tu endang diajar  orang ti landik sereta ngembuan penemu ti dalam ba senentang runding enggau ulah mensia. 

 

Merindang ati sereta nyaga pengerai

Panjai mimit kenang aku senentang pengawa belajar baka ti ditusui di atas nya tadi. Kebuah pia laban nya dikena nimbal sekeda ari tanya bala kaban ti bisi enggau betemu sekumbang lebuh ti belajar. Sida rindu amat bentanyaka pengawa pelajar sereta deka nemu bakani orang ti belajarka PhD belajar. Sebengkah agi pekara ti selalu ditangkan pengajar kitai lebuh ti belajar iya nya pengerai tubuh kitai empu enda tau enda dijaga. Kitai mesti bepengerai nya baru ulih belajar sereta ngaga pengawa enggau manah.

Pengerai tubuh endang besangkut paut enggau runding sereta ati kitai. Enti ati kitai seruran tusah tauka selalu sigau dia alai kitai deka pedis ngereja pengawa. Nyadi siti pengawa ti selalu dikereja bala pengajar enggau nembiak di ANU iya nya sida gempuru begulai ngirup tiap lemai ari lima. Tu selalu agi dikumbai sida Friday Drinks. Pengawa ngirup ti bakatu mega dikena nyelamatka diri ti deka ngetu belelak lebuh ujung minggu. Kelimpah ari nya, ngirup gempuru begulai bakatu manah amai alai bala pengajar enggau nembiak ngaduka kaul sida ngasuh rapit agi. Ari ti betanya enggau becherita ngagai pangan diri kitai ulih besilih runding lalu muka peluang alai kitai ngulihka penemu ti baru.

Nyadi nyaga pengerai tubuh siku-siku endang mayuh jalai baka jogging, ngayuhka basikal, bemain lalu pia mega pengawa bukai ti ulih mansutka peluh lalu nyaga pengerai kitai. Siti ari alai ti selalu dikelingi  bala jogging iya nya Lake Burley Griffith lalu be seberai kitai ulih meda Parliament House. Sekeda ari jalai ti muntang iya nya ngena basikal laban menua Canberra tu endang bisi jalai basikal kediri empu lalu kitai nadai nangi besatup enggau kereta. Lebuh awak ti mayuh agi bisi mega bala mansutka peluh enggau orang “nebas” (main golf)  ba padang golf ti nadai jauh ari alai diau. Aku bisi peluang belajar bemain tu ari siku orang ti landik main tu iya nya Tony Riches. Iya meh ti mai aku meranika diri ngindik padang golf di Canberra. Siti pemanah di Canberra iya nya mayuh amat padang golf alai orang mayuh bemain. Retinya, taja pan kitai ukai kaban kelab tang kitai ulih bemain sereta ngena padang golf alai bemain. Ambika banding siti padang golf ti dikumbai Wood Haven Green Golf Club endang dibuka ngagai orang mayuh tiap ari dua enggau ari empat lalu sapa ti deka bemain endang nadai ditagang sereta semina diasuh mayar enda besai iga. 

Kelimpah ari pengawa ti tau nyaga pengerai bejalai merindang ati baka nemuai ngagai snowfield lebuh musin chelap mega selalu dikereja. Canberra enda bangat jauh ari snow fields baka Mt Selwyn enggau Perish Blue ti endang dipelandikka alai orang bemain ski. Pengawa bukai baka raun meda rampa menua di Canberra mega selalu mega bisi di atur.  Kadang-kadang kami bisi mega dibai meda bansa jelu ti bisi nguan menua Australia baka Kangaroo, beruang Koala, possum enggau mayuh bansa jelu bukai.  Kelimpah ari nya kelab nembiak ti ngaga PhD baka  Post Graduate Association mega selalu bisi ngaduka pengawa begempuru rama tauka “social gathering” . Pia mega ba alai ti diau ba Graduate House endang selalu bisi begempuru rama diatur kena merindang ati tauka ngelimpangka runding ari ti belajar enggau macha bup.      

September 11 ngasuh ati rawan.

Tumu pagi kena 11 September 2001, dia alai telefon ba bilik bemunyi. Aku lalu beguai angkat nyangka bisi pesan  berat laban jarang endar talipaun bemunyi maya nya ari. Maya nya benung musin chelap lalu pedis endar deka ngangkatka diri dani tumu. Lebuh ti ngangkatka talipaun nya baru nemunya pangan aku ti sama ari Malaysia madahka bisi nerima berita  senentang rumah tinggi WTC di Washington udah kena bom. Ati bisi tekenyit mimit tang pengerawan bedau bisi di asai laban apin nemu kebuah utai nya nyadi. Aku lalu tekalanya talipaun ngagai bala bini anak di Kuching madahka pengirau ati diri. Ati ti keran deka ngulihka penemu di menua orang nya ti ngasuh ati takut enggau rawan nya berasai kurang mimit. Dua tiga ari udah bekau nya berita ari CNN, BBC enggau ABC endang selalu belunjak ka berita penusah nya. Tu ngasuh ati berasai takut laban enggaika dunya beperang lalu diri empu benung diau jauh di menua orang. Ati ti deka pulai endang enda tentu ulih ditatka.

Ngaga pansik di Sarawak

Kira setaun udah di Canberra lalu Research Proposal udah tembu sereta udah dikemendarka ngaga pansik dikena nulis thesis. Aku pulaika Sarawak ba pun bulan dua belas 2001 lalu diau di Sarawak setaun laban mansik lalu ngiga kereban ti chukup dikena nulis thesis aku. Jalai ngaga pansik baka ngena jalai betanya berandau, macha suratkabar lama ti bisi mansutka berita ti besangkut paut enggau pansik lalu pia mega bejalai matau menua beratika orang ti deka dipansik. Sekeda ari endur ti alai bejalai iya nya baka Kuching, Miri, Bintulu, Sri Aman, Sibu enggau Sarikei. Setaun di Sarawak indah enda baka pemisi begulai enggau diri sebilik. Sekumbang ti ngaga pansik nya tadi kitai bekereja ngatika diri empu. Kitai semina dipinta nganjung repot ngena email ngagai supervisor di universiti ti alai belajar.    

Nulis thesis

Udah tembu setaun di Sarawak dia alai mulaika baru ke Canberra ba ujung taun 2002. Penurun ke sekalitu endang disadang pedis agi ari ti udah. Kebuah pia laban tu meh maya kitai belabuh nulis ngena penemu ti ulih ari pansik kitai tadi awakka iya tau nyadi penemu ti bebatang segala lalu nyadi siti thesis ti ulih diterima sereta ngembuan standard PhD. Endang sigi amat pedis kelebih agi lebuh kitai ti berunding lalu nuliska penemu kitai nya tadi awak ka iya bejantil lalu nyadi berurun. Tu meh maya tiap iku nembiak ti ngambi PhD chukup merinsa runding lalu kadang-kadang mudah amai kebawan. Lebuh maya utai ti enda ulih tak semak asai rumah alai deka mulaika diri. Jam maya nulis enggau macha endang nadai tentu temu lalu suah agi dikereja sepemanjai ari. Lebuh lelak nulis bisi mega limpang mimit ngirup kopi tauka meda television. Kadang-kadang lebuh kereja ti mekang-mekang nyau sampai ngagai pukul empat tauka pukul lima pagi baru ngetu ngenatka diri. Sekeda ari bala kami bisi bekereja sepemanjai malam lalu tinduk lebuh siang ari. Tu ending dikena ngiga asai nyangka icha runding ulih pansut mudah agi.    

Siti ari pemedis iya nya laban kadang-kadang utai ti udah ditulis kitai selalu diubah tiap kali kitai macha karang nya baru. Lebuh kitai belabuh nulis tak kena asai penemu ti ditulis tang lebuh nyau macha baru dia alai kitai ngasaika utai bisi enda betul sereta deka diubah baru. Pengawa tu dikereja beminggu-minggu lalu bebulan-bulan. Aku agi ingatka pengelama aku ngaga  siti chapter thesis aku ti enda bulih tiga puluh lambar surat. Pengelama aku bibat enggau chapter nya kira lima bulan. Keterubah belabuh nulis iya nya tiga bulan baru iya tembu lalu dianjung ngagai supervisor. Udah diperesa  pengajar dia alai penemu agi bedau tentu nyentuk tauka segala sereta enda tau enda diubah baru. Udahnya belabuh ngubah iya baru dalam pengelama dua bulan nya baru penemu nyemetak agi. Endang sigi amat penemu siko Profesor ti madah ngagai aku pemedis ngiga runding tauka penemu. Iya madahka dalam sari kadang-kadang semina siti genteran jaku aja ti manah sereta tau diguna ulih dituliska kitai. Retinya tebal agi utai ti ditulis kitai nya diubah tauka enda diguna agi lebuh kitai macha karang kitai nya baru. Tang nya meh pengawa nulis thesis iya nya nguingka runding kia-kia awak ka penemu  nyadi nyengala. 

   

Canberra angus Kuching bah

Kena ngalih ari ba 18 Januari 2003 aku benung negringak nulis thesis aku ba bilik belajar di Coombs Building alai aku balat tekenyit lebuh meda asap ti mua pemalat lalu langit bechura chelum. Aku lalu mansutka diri keluar lalu malik ngagai penatai asap. Maya nya udah belabuh musin panas lalu tanah di Canberra lama amai nadai udah ditinggang ujan. Aku lalu masuk ke bilik lalu nguji ningaka radio ngena internet. Ari nya aku ninga jaku tesau ari Australian Broadcasting Corporation (ABC) madahka sekeda ari menua Canberra benung angus diempa api. Semua orang ti diau semak menua nya dipinta rari ninggalka rumah sida lalu sida ti nadai di rumah ditangkan enda diasuh pulaika rumah. Pengelama ti angusnya kira seminggu lalu semua orang ti diau di Canberra endang dipinta bejaga-jaga. Semua bala kami ti diau di Graduate House mega dipinta sedia nyangka api majak nyerarai. Taja pan alai diau enda jauh ari ai, Lake Burley Griffith, tang pengerawan ati endang bisi laban udah meda pemalat sereta enggau peneras api ti diayan ka dalam berita ba televisyen enggau surat khabar. Kami sebuat endang udah besimpan gari dalam beg magang nyangka ti diasuh orang mindah ninggalka alai diau. Nitihka repot ba Canberra Times enda kurang ari 500 buah rumah angus ti ngujungka beribu-ribu iko orang nadai alai diau. Pemesai rampa menua ti diempa api iya nya bepuluh-puluh kilometer pesegi ti ngujungka semua utai tumbuh enggau idup ba endur nya abis magang. Siti ari alai ti balat dikesayauka orang angus iya nya Mount Stromlo Observatory alai bala saintis mansik bintang enggau dunya luar. Perintah menua Canberra mega nudukka siti komiti ti dikumbai Mcleod Inquiry dikena mansik kebuah penusah angus nya tau nyadi.

Kira dua minggu udah Canberra angus dia alai menua di Sarawak kelebih agi di nengeri Kuching ampuh bah. Bah besai tu udah ngampuhka mayuh bengkah genturung pendiau di Kuching. Kena 3 Februari 2003 dia alai  aku bisi nerima email madahka rumah bisi masuk ai bah. Taja pan iya enda balat tang laban ti jauh di menua orang dia alai tempuh berita nya balat endar ngasuh ati tusah sereta irau. Dalam ati aku din tu meh sekeda ari penanggul lebuh kitai jauh ari menua. Tang tu enda ngasuh ati aku tendu tang iya meri peransang ngasuh aku deka jampat agi nembuka thesis aku. 

Saddam Tumbang di Iraq

Kena 17 March 2003 dia alai menua Amerika nyerang menua Iraq laban ti deka numbangka perintah Saddam Hussein ti dipelaba bisi ngembuan senyata bisa ti tau munuh mayuh mensia tauka dikumbai Weapon of Mass Destruction (WMD). Lebuh ti ninga berita menua Amerika ti udah nyerang Iraq dia alai runding aku endang belabaka perang dunya deka nyadi. Kebuah pia laban Iraq menua ti bisi ngembuan kuasa sedadu ti tegap sereta mega mayuh penyukung ari menua bukai ba Timur Tengah. Dua ari udah perang belabuh aku enggau pangan aku siku ari Petaling Jaya lalu mansang ngerepot diri ngagai Embassy Malaysia di Canberra. Kami ngerijista diri awakka nyamai alai orang ari Embassy ngiga kita enti bisi apa nama. Tu endang sigi ari atur enti kitai diau di menua orang. Endang baka selama sida di Embassy lalu nyain passport kami sereta ngerikot nama enggau alai kami diau. Ati balat agi tusah laban menua Australia iya nya sebengkah ari menua ti nyukung Amerika anggau Britain ngelanggar Iraq. Australia mega bisi nganjung sedadu sida beperang di Iraq. Pemutus perintah Australia ti nganjung sedadu sida ke Iraq endang dibantah bala rayat menua Australia. Berindik ari nya sida selalu begempuru bebala mayuh mandangka diri ringat ngagai perintah sida. Pengirau ati bisi kurang mimit lebuh Saddam Hussein udah alah lalu rari ngelalaika diri. Retinya menua Iraq enda ulih nanka diri ari serang menua Amerika. Taja pan mayuh macham utai udah nyadi ti tau ngeruga sereta ngirauka ati tang pengawa nulis thesis endang dipajak awakka jampat tembu sereta jampat agi pulai ninggalka menua orang. Peransang ari bala diri sebilik lalu pia mega jaku sukung ari bala pangan endang selalu ngasuh ati ransing deka nembuka thesis. Pia mega sukung ari supervisor  ngasuh ati betah agi.     

Nganjung thesis

Ba pun bulan dua belas 2004 genap empat taun aku udah “nampuk” di Canberra lalu pengawa aku nyau deka datai ba pengujung. Utai ti ditulis udah bisi nyengala lalu supervisor aku madahka thesis tau diasuh diperesa bala professor ari luar. Kena 2 December 2004 aku lalu nganjung thesis awakka ulih diperesa. Penyuah ti udah nulis sereta ngubah thesis nya bisi lima kali tauka lima iti draft nya baru iya tembu amat. Thesis aku nya diberi aku nama “Politics and Business in Sarawak (1963-2004)” ti meretika kaul politik enggau dagang di menua Sarawak kenyau ari kitai merintah diri menya ba taun 1963. Penyampau leka jaku iya nya seratus ribu endang peyampau ti ditagaka thesis PhD. Taja pan pemutus bedau ditemu tang ati berasai gaga laban ulih nembuka thesis nya dalam timpuh ti disadang. Bala pengajar mega berasai temegah lalu gaga ati. Supervisor aku, Harold Crouch, lalu bisi ngaduka makai selamat ba rumah iya dikena nyelamatka aku ti udah tembu ngaga thesis. Tu endang siti ari adat enggau basa bala professor laban sida gagaka nembiak ti diajar sida iya udah ulih nembuka pelajar. Nitihka penemu sida taja pan adan (pemutus thesis) apin dipeda tang auh panjung orang gagaka kitai datai udah didinga. Retinya kitai udah tau  mujur. Aku mulaika diri ka Sarawak laban pemisi belajar nyau udah abis. Taja pan ati gaga udah tembu nulis thesis tang dada agi ketap-ketap laban nganti pemutus thesis ti diperesa tiga iko orang ti landik ari universiti bukai. Sida tu nadai dipadahka nama tang endang orang ti landik pasal utai ti ditulis kitai dalam thesis nya sereta bisi penelaba meresa thesis PhD.     

Pemutus

Pagi 13 Mei 2005 lebuh ti muka email dia aku tekenyit lebuh nerima email ari supervisor aku ti madahka pemutus thesis aku.  Email iya munyi tu : Congratulations. It was a rather long wait but in the end worth it. Best wishes, Harold. Kira bisi sepuluh minit udah macha email nya aku agi temati kutu lalu enda berasai ai mata neritik ngemasahka kuyu. Nya meh ai mata gaga tauka “tears of joy” nandaka pengaga ati ti enda ulih dipansutka enggau jaku. Lebuh datai di rumah aku lalu merap semua kami sebilik. Aku udah mujur. Taja pan kami lama beserara lalu mayuh endar utai ti ngerawanka ati udah nyadi tang aku udah ulih mujur dalam pengawa ti dujuluk ati aku. Aku mega ngenataika berita gaga tu ngagai pangan aku KC Kumar ti enggau aku berandau ba pun cherita tu tadi. Ari Kerala di menua India iya mega malas email aku dikena ngenataika pengaga ati ari iya enggau sida sebilik.

Penutup

Munyi ti udah disebut dulu agi ari tu, kenang dalam karang aku tu nyerangkung timpuh empat taun lebuh ti betapa ngiga penemu. Pejalai empat taun nya endang nadai tentu meruan. Bisi nya tusah lalu kadang-kadang bisi mega senang.  Iya penuh enggau mimpi takut sereta rawan baka penusah bah, angus, perang enggau mayuh leman bukai ti enda disadang mega udah dikenang. Lalu enti sema bisi orang nanya aku senentang asai ngaga PhD dia alai aku deka madah ngagai sida  belajarka PhD nya meh utai ti pengabis pedis udah diasaika dalam pengidup aku. Iya balat begunaka pengeliat ati. Tang aku berasai gaga laban udah ulih nembuka pengawa sekula aku ti berengkah ari SRK Nanga Apan di Kabo ba taun 1971 menya lalu tembu di Canberra ba taun 2004. Enti dipegulaika sekali dia alai pengelama besekula iya nya 21 taun. Ka penudi aku arapka pengingat aku tu tau meri peransang enggau penguntung ngagai pemacha kelebih agi bala ti bisi penerindu nampung pelajar ngagai iya ti tinggi agi.

Selamat mansangka mua ngagai semua pemacha PEGARI.     

Dikarang

Dr. Neilson Ilan Mersat, PhD.

(Political Science & International Relations)

Rh Bungkung

Meruji, Kabo

95400 Saratok.