Nitihka
pansik siku ari scholar kitai Iban di
Sarawak iya nya Dr Peter Kedit (1993 :3-4)
dia alai “bejalai” tauka “pegi” endang siti ari pengawa ti kereja sereta
dipelandikka kitai Iban kenyau ari jeman kelia. Dalam bup iya ti dikumbai “Iban Bejalai” dia alai Peter Kedit mansik
enggau dalam agi senentang reti pengawa bejalai dalam pengidup bansa kitai
Iban. Pengawa bejalai tu mega bisi kena pansa sereta dikenang bala pemansik
bukai baka Freeman (1970:24), Jensen (1974:51), Sather (1994 :24) enggau
Pringle (2010 :23).
Ba
taun 2009 UNIMAS bisi ngepunka siti pansik ti ngembuan tuju deka nyidi tauka ngiga
bala kitai Iban ari Sarawak tu udah melunggang bejalai pindah ngagai menua
Sabah. Pemindah ti baka tu endang besangkutpaut enggau pengawa bejalai. Projek
nya dipejalaika ngena belanja ari Dayak Chair lalu betuaika Professor Spencer Empading ari Fakulti Sains
Sosial, Universiti Malaysia Sarawak. Pansik tu besai amat serangkung lalu ukai
semina mansik senentang ari pun sida ti pindah menya tang lalu nyentuk ngagai gaya
pendiau bala Iban di Sabah nyentuk ngagai saritu. Sekumbang ti ngaga pansik
kami sebuat suah amat nemuai ngagai menua Tawau di Sabah ngabas dua bengkah
genturung pendiau kitai Iban ti bisi di menua nya.
Pansik ti digaga Benedict Sandin enggau bala ti bukai sama bela sampal sepenemu lalu setujuka penatai kitai Iban di Sarawak enggau Sabah endang ari Batang Kapuas di Indonesia. Batang Kapuas iya nya siti ari sungai ti panjai di Kalimantan. Ari meratika adat, pendiau, cherita lama enggau pengingat raban bansa dayak ti ngembuan Batang Kapuas endang sigi amat betul penatai kitai Iban tu sigi ari Batang Kapuas dimenua Kalimantan. Ambika banding ba tengah-tengah indu nengeri Kalimantan Barat di Pontinak didirika orang sebuah rumah panjai ti dikumbai Rumah Adat Dayak. Di Muzium Balanga di indu nengeri Kalimatan Tengah iya nya di Palangka Raya dia alai bisi muzium siti ti mayuh endar nyimpan artifacts sekali barang ti sama bisi dikena kitai Iban dulu menya lalu nyentukka sari tu. Ambika chunto duku ilang, tajau, enggau utai bukai ti bisi ba bansa kitai Iban. Pia mega enti kitai terengkah ba padang bilun di Balik Papan dia alai kitai meda ukir sentagir ngelingi tiang ba padang bilunnya. Tu endang mandangka menua kalimnatn bisi ngembuan pengawa ti sama bisi dikembuan bala kitai Iban. Udah tembu matau semua indu nengeri di menua Kalimantan iya nya Kalimanatan Barat (2005,2006,2008,2010), Kalimantan Selatan (2007), Kalimantan Timur (2008) enggau Kalimantan Tengah (2011) sereta bisi bekelala lalu udah ngaduka kaul enggau sekeda ari scholar ari mayuh bengkah pelilih menua nya tadi dia alai aku nadai sanggu agi nerima teori ti madahka kitai Iban sigi datai ari Kalimantan. Semina utai ti begunaka pansik ti dalam agi iya nya kemaya sida belabuh pindah lalu bakani pengelama kitai Iban udah pindah ari menua lama kitai nya. Di Sabah pansik dua iku nembiak ari Universiti Malaysia Sabah iya nya Florence Anak Bayak (2006) enggau Amrullah Bin Maraining (2010) tau mega endar nerangka ngagai kitai senentang pemindah enggau pengidup bala Iban di Sabah.
BalasPadam