Sarawak begunaka mayuh pengajar Jaku Iban
Utusan Borneo by Rengenyan Labang. Posted on July 29, 2012, Sunday
BEBENDAR NYUNGKAKKA JAKU IBAN: (Ari kiba) Andrew, Jabu enggau Romie dalam aum pengarang berita pengudah pengawa bejadika Randau Pemasang Pelajar Jaku Iban Dalam Sekula.
Sapit Kepala Menteri, Datuk Patinggi Tan Sri (Dr) Alfred Jabu anak Numpang madah, nya mega ulih dikena napi suntuk pengajar jaku Iban di menua tu.
Nya alai kena nangkup peminta pengajar bepenemu sereta landik dalam jaku Iban, jaku Iban endang patut bisi dipelajar ba renggat master enggau Phd, kelimpah dipelajar ba sekula primari enggau sekondari sereta diploma enggau ijazah.
Nitihka penerang iya, diatu bisi 693 bengkah sekula Primari nyendiaka pelajar jaku Iban ke mungkur 48,969 iku nembiak sekula enggau 95 bengkah sekula sekondari ti nyerangkung 22,512 iku nembiak sekula.
Ba Institut Pematih Pengajar (IPG) Rajang diatu bisi 44 iku nembiak ngambi pelajar dalam jaku Iban pengelama lima taun ti nyengkaum 24 iku masuk bulan Jun 2011 enggau 20 iku masuk bulan Jun 2012. Enti sida pas ila semua sida tu deka ngajar jaku Iban, ku iya.
“Laban kitai amat begunaka pengajar jaku Iban, kitai nguji deka nempa mayuh agi pengajar jaku Iban enda ngira sekalika pengajar nya bansa Iban tauka pengajar ari bansa bukai. Tu beduduk ari mayuh bansa bukai milih jaku Iban nyadi sebengkah matapelajar dipelajarka sida.
“Program tu deka dipejalai ninting taun, lalu kitai nguji sekalika semua IPG ulih nyendiaka pelajar jaku Iban laban kitai amat begunaka mayuh pengajar jaku Iban. Ari tu kitai ulih nempa mayuh pengajar jaku Iban ti bepenemu sereta landik,” ku iya ngarapka suntuk pengajar jaku Iban teputar beduduk ari pemayuh nembiak sekula ngembuan pengerindu belajarka jaku Iban.
Jabu ti nyadi Menteri Betanam Betupi Chara Moden mansutka penerang nya lebuh ti dikerandau pengarang berita pengudah iya bejadika Randau Pemansang Pelajar Jaku Iban Dalam Sekula ti diatur Komiti Rama enggau Belelak Saribas (SSRC) ba sebengkah hotel ditu, pagi kemari.
Jaku Iban kelimpah dikemeran ba sekula enggau IPG diatu udah ngerembai ngagai renggat universiti iya nya ba Universiti Perguruan Sultan Idris (UPSI) enggau Universiti Malaysia Sarawak (UNIMAS).
Ba UNIMAS dalam taun 2011 bisi 49 iku nembiak ngambi pelajar jaku Iban, lalu ba taun 2012 bisi 34 iku (Ambi Jan) enggau 35 iku (Ambi Julai).
“Ba UPSI naka kediatu bisi 71 iku nembiak ngambi pelajar jaku Iban ke nyangkaum 25 iku ngambi pelajar ba renggat ijazah lalu kebukai ba renggat Diploma.
“Ba UPSI kelimpah ari bansa Iban bisi bansa bukai ti ngembuan pengerindu deka ngambi pelajar jaku Iban. Kitai arapka UPSI ulih berundingka sida nya. Tebal agi sida nya peranak Sarawak,” ku iya ti mega nyadi Menteri Pemansang Menua Pesisir Sarawak.
Kelimpah ari nya, pengajar ti ngajar jaku Iban mega ukai semina pengajar kitai bansa Iban tang mega nyengkaum pengajar ari bansa bukai (Bidayuh, Melayu, Melanau, Kenyah, China, Kayan, Punan, Kejaman enggau Lun Bawang).
Kelimpah ari lebuh diitanya sekalika bisi perambu jaku Iban dipelajar ba renggat prasekula, iya madah, endang juluk kitai deka ngemansang sereta ngerembaika pelajar jaku Iban berengkah ari renggat baruh nyentukka Phd.
Ku iya, laban jaku Iban sama tikas enggau jaku Mandarin enggau Tamil lalu sekula deka ngaga langgur ngambika subjek nya (jaku Iban) ulih diajar.
“Tang nengah peneleba, kena ngemansangka jaku enggau kurikulum, semua nya begunaka langkar kereja. Enti bisi langkar kereja kitai ulih bepelasarka nya, tang naka kediatu kitai bedau ulih belabuh laban nadai keretas kereja, turai pelajar jaku Iban (renggat prasekula) enggau pengajar ti bepenemu,” ku iya.
Bisi datai ba pengawa bejadika randau nya kemari, Chairman SCRC Andrew Bangkam Bejie; Residen Bagi Menua Betong Datu Romie Daniel, Menteri Muda Pengintu Pengelantang ti mega Kaban Kunsil Nengeri Bukit Saban Robert Lawson Chuat enggau pemesai kebukai.
Read more: http://www.theborneopost.com/2012/07/29/sarawak-begunaka-mayuh-pengajar-jaku-iban/#ixzz23f7Ua7Ss
Tiada ulasan:
Catat Ulasan