Sanggup betunggang lupung meri penemu
by Chris Bishop. Posted on March 30, 2012, Friday
NEMPA SEJARAH: (Ari dua kanan) Dr. Neilson, Daniel Tajem, Edmund langgu, Celestine Ujang, Hatta enggau Peter bela meri sukung ngagai Biography Dato Sri Edmund Langgu anak Saga.
KOTA SAMARAHAN: Bup (Biography) ke ditulis Dr. Neilson Ilan Mersat (Sapit Dekan Fakulti Sains Sosial, Research and Postgraduates) enggau Prof Dr. Spencer Empading (Dekan Fakulti Sains Sosial), pasal cherita seiku ari ketuai sereta pengiring bansa Iban ke dulu suba, Dato Sri Edmund Langgu anak Saga mujur dipenyadika Universiti Malaysia Sarawak (UNIMAS), ditu kemari.
Pengawa bejadika biography nya ditukuka Menteri Pemansang Rama Tan Sri William Mawan.
Sekeda ari pansa cherita dalam bup nya nusui pejalai enggau pengawa Dato Sri Edmund Langgu anak Saga ba pekara adat enggau main asal bansa Iban, pekara sosial sereta pejalai politik iya dalam parti SNAP, PBDS enggau BN.
“Aku berasai gaga sereta puas ati enggau asil bup ke udah dipansutka sehari tu ke tau bendar nyadika kelai pengering pengawa ke udah dikereja aku sepengelama nyadi kaban parlimen kenyau ari taun 1963 suba,” ku Langgu lebuh dikerandau pemberita kemari.
Ku iya, gaya atur perintah raban ketuai ke dulu suba enggau kemaya hari tu sigi bebida. Ari atur pemansang kitai nyadang mayuh ubah digaga ba kandang nengeri pia mega kandang menua pesisir.
“Tang ari perati aku, pemansang ba kandang menua pesisir bedau manggai ba tikas ke patut maya ke diatu.
“Maya kitai numbuhka Malaysia suba, kitai sigi arapka kandang menua pesisir dikemansangka lengkas tang diatu agi ba baruh tikas ti disadang,” ku iya.
Iya ke nyadi seiku ketuai ke bela begulai enggau raban ketuai bukai ngulihka kuasa merintah kediri ari British lalu numbuhka Malaysia agi ingatka jaku Tunku Abdul Rahman ke madah “Enti kitai udah lepas ari kuasa British lalu ngembuan kuasa merintah diri kitai deka berundingka chara ke patut ngemansangka menua”.
“Ari semaya Tunku nya, bisi udah dipejalaika tang bisi mega enda dipejalaika. Nyadi ku Temenggung Jugah (maya nya), anang nyadi pun tebu, keterubah aja manis tang ba ujung tabar.
“Nyaut Tunku, anang tusah Temenggung, kitai ulih ngatur, laban enti kitai udah merintah diri semua nya bepanggai ba raban ketuai bejalaika program pemansang ke udah diperambu,” ku iya.
“Tu meh jaku ari dua iku ketuai ke tebilang ke didinga pending aku maya nya,” tandu iya.
Bup Dato Sri Edmund Langgu anak Saga mega nusuika cherita Langgu ke ngembuan mayuh peneleba, ada ari ruang bilik ke kurang pemisi tang ngembuan penegap runding deka ngemansangka diri ngiga pemandai sereta penemu.
Langgu ke beumur 76 taun diatu mayuh bekunsika penemu ba pekara politik menua Malaysia. Iya berengkah ngaulka diri ba pekara politik ba pun taun 1960 lalu kala nyadi Sekretari Besai parti SNAP.
Langgu mega kala nyadi ketuai penyakal ba Dewan Rakyat (parlimen) ba taun 1975 sebedau dipadu nyadi Sapit Menteri Betanam Betupi perintah besai ba taun 1976 sepengudah SNAP beserakup enggau BN.
Kelimpah ke ransing ba pengawa politik, Langgu mega seiku ketuai ke landik ba pekara adat enggau main asal kitai Iban alai gaya pengidup bansa Iban ba rumah panjai sigi seruran dampih ba ati iya.
Bup tu mega nusuika peneleba Langgu napi jeman perintah ke bebida berengkah ari jeman Brooke, Jepun, British nyentuk ke Sarawak teulihka kuasa merintah diri beserakup dalam Malaysia.
Langgu berengkah teulihka pelajar ba sekula St Augustine, Betong alai iya bedarat sepengelama 3 hari ari rumah panjai iya ba Saratok.
Sepengudah pinchin ba pengawa politik, Edmund angkun ngerembai sereta ngemansangka jaku enggau main asal kitai bansa Iban nengah kaul iya begulai enggau Tun Jugah Foundation.
Dato Seri Edmund Langgu udah betunggang lupung meri penemu enggau tulang ansang ukai semina ngagai Malaysia tang mega ngagai nengeri sereta rayat Sarawak alai iya chukup ransing ba pengawa politik ba taun 1970, 1980 sereta pun taun 1990.
Pengangkun iya nyadi seiku ketuai sereta penemu iya ba sejarah, adat enggau main asal Iban nempa nama Dato Sri Edmund Langgu anak Saga dikenang ba sejarah pengidup enggau politik Malaysia.
Bup Dato Sri Edmund Langgu anak Saga aruh dibeli sereta dibacha semua.
Bela datai ba pengerami nya Sapit Kepala Menteri Sarawak ke dulu suba Dato Sri Daniel Tajem, Naib Presiden DCCI Dato Sri Celestine Ujang, Naib Chancelor UNIMAS Prof Datuk Dr. Khairuddin Abd Hamid, Sapit Naib Chancelor Prof dr. Peter Songan sereta Chairman Raban Direktor UNIMAS Datu Dr. Hatta Solhi.
Atur ngenegapka Jaku Iban begunaka mayuh saup: Gai
Read more: http://www.theborneopost.com/2012/03/30/sanggup-betunggang-lupung-meri-penemu/#ixzz23f3a51mj
Tiada ulasan:
Catat Ulasan