KPM siru ngintu matapelajar Jaku Iban

Utusan Borneo

Posted on July 12, 2011, Tuesday

Raban bansa Iban patut ngemeratka peransang Opis Menteri nya
KOTA SAMARAHAN: Universiti Malaysia Sarawak (UNIMAS)Fakulti Sains Sosial madahka pemansang Jaku Iban dipejalaika Opis Menteri Pelajar (KPM) enggau naka penyiru.
Kepala fakulti nya Profesor Dr. Spencer Empading Sanggin kemari madahka nengah pengelandik baka Padang Luna ba Unit Pemansang Kurikulum Bagi Etnik Jaku ba Opis Menteri nya, Francis Mancha ba Opis Pelajar Bagi Iban, Dr Chemeline Usop enggau Dr Roseline Sandai ba Universiti Perguruan Sultan Idris (UPSI) Perak sereta sekeda bala pengajar ba palan pematih, raban bansa tu ulih meda pengerembai jaku nya.
Sida udah nempa Turai PJaku Iban ti dikena ba sekula sereta mega jaku ke setindit ba sistem pelajar Jaku Iban, ku iya.
Iya mega madah jaku Iban sigi kaya lalu diatu bisi sekeda gerempung ngereja pengawa nusun sereta naruh leka jaku ngambika enda lenyau sengapa sereta tenggelam dibai arus pemansang moden.
“Semua pengawa nya kena meransang raban bansa Iban lalu sida anang tekenyit ati enti ninga pelajar Jaku Iban nyadi sebengkah mata pelajar universiti,” ku iya madah ngagai komiti pengatur Forum Jaku Iban 2011 ti ngarika seraban surat kabar ke pegari ari See Hua Group.
Raban Komiti ti nemuai ngagai Profesor Spencer nya diketuaika co-Chairman Edwin Jemat ke lalu nyadi editor ba Utusan Bornoe Bagi Iban, Empawi Jabat mega editor ba Bagi Iban, Churchill Edward Ketuai Pengarang Berita ba Borneo Post enggau Mathias Kassap ari UB Iban.
Sama bisi nyempulang iya nyambut penemuai raban nya Sapit iya (Postgraduate Studies & Reseach) Dr Neilson Ilan Mersat.
Spencer madahka fakulti nya nyukung sereta deka datai ngulu Forum Jaku Iban 2011 lalu nyadi seiku ari kaban ba forum nya. Iya mega madahka bisi kala, urung taun 1990 suba pengawa diatur kena ngangkat sereta ngatur jaku Iban nya nyadi setindit.
Iya mega madahka Dato’ Profesor Emeritus Dr. Asmah Omar ke ukai ari raban bansa Iban tang udah mujur bulih pangkat Dr. ari pansik iya ba Jaku Iban.
Nyerumba nya mega, Edwin ngenataika pengaga ati sereta temegahka Spencer ke udah teulihka pangkat Profesor nitihka singkang profesor Dr. Jayum enggau profesor Dr. Dimbab Ngidang.
Form Jaku Iban nya ila deka mantaika empat iti keretas kereja sereta tagit deka ngelumuka urung 200 bala nembiak, pengajar sereta orang bukai ke bisi pengerindu ngintu Jaku Iban. Forum nya disukung Opis Menteri Pemansang Rama enggau Kandang Mengeri (KPSU). Utusan Borneo (UB) enggau Mimbar Permaufakatan Ibubapa Sarawak (Mapim) bela bekerejasama ngatur forum nya.
Raban seketeriat ngelaluka penemu sereta belanja ari mensia mayuh kena ngemujurka forum tu. Forum Iban tu ukai iya ke terubah tang deka nyadika pelasar kena ngatur forum ari etnik bansa bukai ba menua tu.
Raban seketeriat tau dikangau nengah lumur 019 8279067 (Churchill), 019 8872887 (Wan Zain) 010 5298589 (Edwin) enggau 014 8905937 Mathias, tauka nengah email chuechilldrrem@gmail.com, zain_mahmud@yahoo.com.my sereta mathiasfieldteam@gmail.com.

Read more: http://www.theborneopost.com/2011/07/12/kpm-siru-ngintu-matapelajar-jaku-iban/#ixzz23f47TzbB