Bup subjek sejarah deka dikemanahka agi

Bup subjek sejarah deka dikemanahka agi: Dr Neilson

by Chris Bishop. Posted on May 5, 2011, Thursday

Kena ngangkatka ulah angkun sereta taluk ke menua ba raban nembiak sekula nyengkaum sejarah ke nyadi ba menua S’wak
KUCHING: Kurikulum enggau bup pelajar tauka subjek sejarah ungkup sekula sekondari pom Satu nyentukka pom Lima deka dikemanahka baru ngambika ulih ngangkatka ulah angkun sereta taluk ke menua ba raban nembiak sekula kelimpah ari negapka diri nyadi rayat Malaysia.
Sapit Dekan Fakulti Sains Sosial Universiti Malaysia Sarawak (UNIMAS) Dr Neilson Ilan Mersat madahka pengawa tu digaga sereta dipansik baru setipak enggau juluk perintah nengah opis pelajar ke deka netapka subjek sejarah nyadi bengkah pelajar ke patut pass ba renggat Sijil Pelajaran Malaysia (SPM) ba taun 2013.
“Kurikulum enggau bup pelajar sejarah deka digaga tambah sereta dikemanahka agi lalu tu deka nyengkaum sejarah ke nyadi ba menua Sarawak.
“Manggai ba taun 2014 subjek sejarah deka ditetapka nyadi subjek ke patut pass ba renggat SPM lalu dikearapka ulih meri pemereti ngagai nembiak sekula senentang ulah beserakup enggau penaluk ngintu menua,” ku iya.
Dr. Neilson ke udah dipilih nyadi komiti pengawa pemansik subjek sejarah tu bejaku ngagai pengarang berita sepengudah pulai ari Kuala Lumpur begulai enggau raban komiti bukai betemu enggau Sapit Menteri Besai (TPM) Tan Sri Muhyiddin Yassin berandauka isu tu ensanus.
Komiti ke udah dipilih ensanus tu deka betuaika Chairman Gerempung Sejarah Malaysia Datuk Omar Mohd Hashim sereta Dekan Fakulti Sains Pentadbiran enggau Pelajar Polisi Universiti Teknologi MARA Datin Paduka Prof Dr Ramlah Adam ti dipilih nyadi Sapit Chairperson.
Entara raban komiti bukai ke udah dipilih iya nya Prof Sejarah Tan Sri Dr Khoo Kay Lim ari Universiti Malaya (UM), Akeologi Prof Emeritus Datuk Dr Nik Hassan Suhaimi Nik Abdul Rahman ari Universiti Kebangsaaan Malaysia (UKM), Prof Dr Danny Wong Tze ken ari UM, Prof Dr Ranjit Singh a/l Darshan Singh ari Universiti Utara Malaysia, Tuai Opis Sejarah Universiti Malaysia Sabah Associate Prof Dr Ismail Ali, Sapit Prof Dr Shamrahayu Abdul Aziz ari Universiti Islam Antarabangsa (UIA) Malaysia Fakulti Undang Undang, Dr Neison Ilan Mersat Sapit Dekan Fakulti Sains Sosial UNIMAS enggau Dr Benedict Topin ari Kadazandusun Cultural Association.
Lebuh dikerandau pemberita, Dr Neilson ngelalu penemu mensia mayuh ke deka ngenataika buah runding senentang bengkah sejarah menua ke patut dipasukka ngagai kurikulum sereta bup matapelajar nya ke deka dikemanahka baru nya.
“Megai tanggung pengawa nambah sereta ngemanahka subjek sejarah ngarika Sarawak, aku ngelalu mensia mayuh ngenataika buah runding senentang sejarah menua ke patut dipasukka,” ku iya.
Mensia mayuh ke deka ngenataika buah runding tu tau betelefon ngagai iya nengah lumur 082-582258 tauka nengah e-mail neilsonmersat@yahoo.com.

Read more: http://www.theborneopost.com/2011/05/05/bup-subjek-sejarah-deka-dikemanahka-agi-dr-neilson/#ixzz23f285P7C